Մեկնարկում են հանրապետական ուսանողական մարզական խաղերը. մեր հավաքականները ևս կմասնակցեն

Մարտի 19-ին կմեկնարկեն 13-րդ Հանրապետական ուսանողական մարզական խաղերը` նվիրված ՀՀ ԶՈՒ կազմավորման 20-ամյակին:

Ինչպես տեղեկացանք ՀՊՏՀ ֆիզդաստիարակության ամբիոնի պրոֆեսոր Լևոն Սամվելյանից` մարզական խաղերը կմեկնարկեն վոլեյբոլի  առաջնությամբ: Մեր համալսարանն իր մասնակցությունը կբերի վոլեյբոլ, բասկետբոլ, սեղանի թենիս, շախմատ մարզաձևերում աղջիկների և տղաների հավաքականներով, ձեռքի գնդակ և մինի ֆուտբոլ մարզաձևերում` տղաների հավաքականներով:

«Դեռևս հստակեցված չէ, բայց հնարավոր է, որ կմասնակցենք նաև կրոսավազքին, որն անցկացվելու է Վանաձորում, իսկ լողի մրցումներին` անհատական մասնակցությամբ»,- լրատվության և հասարակայնության հետ կապերի բաժնին հայտնեց ամբիոնի վարիչը` հույս հայտնելով, որ ամբողջ ուսումնական տարին մարզական կյանքը հագեցած կլինի և ՀՊՏՀ-ականները առիթ կունենան երկրպագելու իրենց հարազատ թիմերին:

Մենք նույնպես մեր համալսարանական թիմերին մաղթում ենք մարզական աննախընթաց վերելքներ ու հաղթանակներ:

ՀՊՏՀ Լրատվության և հասարակայնության հետ կապերի բաժին