Պորտուգալացի ակադեմիկոս Կառլոս Ֆերնանդեսը ՀՊՏՀ–ում հանդես եկավ դասախոսությամբ
Այսօր ՀՊՏՀ նիստերի սրահում զբոսաշրջության զարգացման ժամանակակից թիրախների մասին դասախոսությամբ հանդես եկավ զբոսաշրջության ուսուցման դասընթացների ղեկավար, Եվրախորհրդի և զբոսաշրջության համաշխարհային կազմակերպության խորհրդատու, Պորտուգալիայի Վիանա դե Կաստելոյի պոլիտեխնիկական ինստիտուտի ակադեմիկոս Կառլոս Ֆերնանդեսը: Դասախոսությանը մասնակցում էին հակաճգնաժամային և զբոսաշրջության կառավարման ամբիոնի վարիչ Նելլի Շահնազարյանը, ամբիոնի դասախոսներն ու ուսանողները, որոնք մեծ հետաքրքրությամբ ունկնդրեցին պորտուգալացի մասնագետի դիտարկումները` նվիրված զբոսաշրջության զարգացման հեռանկարներին:
Կառլոս Ֆերնանդեսը, խոսելով զբոսաշրջության զարգացման նպատակների մասին, անդրադարձավ զանգվածային ու այլընտրանքային զբոսաշրջությանը` կարևորելով հատկապես մշակութային զբոսաշրջության զարգացումը: Պորտուգալացի մասնագետի դիտարկմամբ` զբոսաշրջության վերը նշված ուղղությունը նպաստում է զբոսաշրջիկների վարքագծի փոփոխությանը և ստեղծագործական մտքի վերելքին: Կառլոս Ֆերնանդեսը ներկայացրեց նաև մշակութային զբոսաշրջության մեջ գործող ծառայությունները` քայլ առ քայլ հիմնավորելով դրանց անհրաժեշտությունը:
Դասախոսությունն ամփոփվեց բազմաբնույթ ու ուշագրավ հարց ու պատասխանով:
ՀՊՏՀ Լրատվության և հասարակայնության հետ կապերի բաժին