Մագիստրոսական կրթական ծրագրի շնորհանդես ՀՊՏՀ-ում

Դիտումների քանակ՝ 1940

ՀՊՏՀ  որակի ապահովման  բաժնի պետ Ներսես Գևորգյանն այսօր նիստերի սրահում բակալավրիատի ավարտական կուրսերի ուսանողներին  ներկայացրեց 2017-2018 ուստարվա համար «Նախագծերի կառավարում»  մագիստրոսական ծրագիրը, որը համատեղ իրականացնում են  Հայաստանի պետական տնտեսագիտական, Ճարտարապետության և շինարարության Հայաստանի ազգային,  Վալենսիայի պոլիտեխնիկական համալսարանները և Բոլոնիայի համալսարանի Ռիմինիի մասնաճյուղի տնտեսագիտական ֆակուլտետը (Իտալիա): «Նախագծերի կառավարում»   մասնագիտությամբ մագիստրոսական ուսման տևողությունը 2 տարի (4 կիսամյակ) է. 1-ին տարում ուսումնառությունն իրականացվելու է Հայաստանում՝ ՀՊՏՀ-ում և ՃՇՀԱՀ-ում, 2-րդ տարում ուսանողները կսովորեն Վալենսիայի պոլիտեխնիկական համալսարանում (ՎՊՀ): Մագիստրանտները կստանան Բոլոնիայի համալսարանի Ռիմինիի մասնաճյուղում  փորձառություն անցնելու և ավարտական թեզը կատարելու հնարավորություն: Ուսումնառության ավարտին կտրվի 3՝ ՀՊՏՀ և ՃՇՀԱՀ և ՎՊՀ դիպլոմ: Շրջանավարտներին կշնորհվի կառավարման, նախագծերի կառավարման մագիստրոս որակավորումը:

Ներսես Գևորգյանը անդրադարձավ  4 կիսամյակներում դասավանդվելիք առարկաներին, տեղեկատվական տեսանյութեր ներկայացրեց  արտերկրի վերոնշյալ համալսարաններից՝ ընդգծելով, որ նոր մագիստրոսական ծրագիրն ունի մրցակցային մի շարք առավելություններ, որոնցից մեկն այն է, որ այս կրթությունը հնարավորություն է ընձեռելու աշխատելու ինչպես Հայաստանում, այնպես էլ Եվրոպայում: Նշենք, որ կրթությունն իրականացվում է ինչպես անվճար, այնպես էլ վճարովի հիմունքներով:

Բանախոսը պատասխանեց ուսանողների հարցերին:

Տեղեկացնենք, որ «Նախագծերի կառավարում»   մասնագիտությամբ (առկա մագիստրատուրայի)  դիմում-հայտերն ընդունվում են հունիսի 2-ից սկսած:

ՀՊՏՀ առկա մագիստրատուրայի մասնագիտությունների ցանկին, որն ավելի վաղ հրապարակել էինք, ծանոթացեք այստեղ՝ http://media.asue.am/upload/ndunelutyun_2017/Arka_Magistratura_2017-18.pdf :

ՀՊՏՀ Լրատվության և հասարակայնության հետ կապերի բաժին