Հոբելյան, նոր նշանակում և այլ հարցեր. տեղի ունեցավ ռեկտորատի հերթական նիստը

ՀՊՏՀ նիստերի դահլիճում այսօր տեղի ունեցավ ռեկտորատի հերթական նիստը, որի օրակարգային հարցերից առաջ խոսքով հանդես եկավ ՀՊՏՀ ռեկտոր, պրոֆեսոր Կորյուն Աթոյանը:

Հայաստանի պետական տնտեսագիտական համալսարանի ռեկտորատի, պրոֆեսորադասախոսական կազմի, աշխատակիցների, ուսանողների անունից ՀՊՏՀ ռեկտորը շնորհավորեց բարձրագույն մաթեմատիկայի ամբիոնի դեցոնտ, ֆիզմաթ. գիտությունների թեկնածու Հենզել Մկրտչյանի ծննդյան 70-ամյակը՝ հղելով ջերմ շնորհավորանքներ:

«Աշխատանքային կենսագրության 50 տարիների ընթացքում Դուք անցել եք հարուստ ճանապարհ՝ ինժեներ-տեխնոլոգից մինչև բաժնի վարիչ, արտադրականից ու հետազոտականից մինչև գիտամանկավարժական աշխատանք: 1984 թվականից, ավելի քան երեքուկես տասնամյակ, մեր համալսարանում եք և հետևողականորեն զբաղվում եք բարձրագույն մաթեմատիկայի, դրա կիրառության, տնտեսամաթեմատիկական մեթոդների և մոդելների հիմնահարցերով: Գիտաժողովներում, գիտական հանրույթի հետ աշխատանքային բազմապիսի հավաքներում, վերապատրաստման ծրագրերում կատարելագործել եք Ձեր մասնագիտական կարողություններն ու որակը, հանդես եկել արժեքավոր զեկուցումներով, որոնք այնուհետև հրապարակվել են և դասագրքերի, ուսումնաօժանդակ նյութերի, խնդիրների ժողովածուների հետ մեկտեղ ձևավորել են  Ձեր գիտահետազոտական աշխատանքների համահավաքը»,- նշեց Կորյուն Աթոյանը՝ հոբելյարին հանձնելով շնորհավորական ուղերձ: Համալսարանի ղեկավարը նկատեց, որ հոբելյարի մարդկային տեսակը հիացմունքի է արժանի, նա սիրված և հարգված գործընկեր է, մանկավարժ-գիտնական:

Հենզել Մկրտչյանն, արձագանքելով շնորհավորանքին, իր երախտագիտությունը հայտնեց ռեկտորատին և անձամբ ռեկտորին, նշեց, որ իր համար հաճելի էին ռեկտորատի և կոլեգաների գնահատանքի խոսքերը լսելը, ապա հավելեց. «Կարծում եմ, ես դեռ ունեմ բավականաչափ եռանդ՝ իմ փորձն ու գիտելիքները երիտասարդ սերնդին փոխանցելու համար»:

Այնուհետև Կորյուն Աթոյանը ռեկտորատին հայտնեց, որ հաշվապահական հաշվառման և աուդիտի ֆակուլտետն ունի նոր դեկան: Այսուհետ ֆակուլտետը կղեկավարի աշխատանքի տնտեսագիտության ամբիոնի դոցենտ, տ.գ.թ. Մերի Բադալյանը: Ռեկտորը շնորհավորեց նրան և մաղթեց արդյունավետ գործունեություն:

Ռեկտորատի օրակարգային հարցերի շարքում զեկուցումներով հանդես եկան դեկանները՝ ներկայացնելով առկա ուսուցման մագիստրատուրայի 2-րդ կուրսի ուսանողների գիտահետազոտական փորձառության և մինչև 12 կրեդիտ ակադեմիական պարտք ունեցող ուսանողների վերահանձնումների արդյունքները:

Ընթացիկ հարցերի շարքում քննարկվեցին ՀՊՏՀ ռեկտորին ուղղված ուսանողների դիմումները, ուսման վարձերի վճարման գործընթացին վերաբերող և մի քանի այլ հարցեր:

ՀՊՏՀ Լրատվության և հասարակայնության հետ կապերի բաժին