ՀՊՏՀ մարզիկները հաղթել են ձյուդոյի միջբուհական առաջնությունում. 1 ոսկե, 2 բրոնզե մեդալներ

ՀՀ բուհերի ուսանողների 18-րդ հանրապետական մարզական խաղերի շրջանակում մայիսի 7-ին տեղի է ունեցել ձյուդոյի առաջնությունը, որում  7  քաշային կարգերում մրցակցել են 9 բարձրագույն ուսումնական հաստատությունների (ՀՊՏՀ, ՀԱՊՀ, ՀԱԱՀ, ՀՖԿՍՊԻ, ՀՌՀ, ՀՖՀ, ՃԿՊԱ, Տերնոպոլի ազգային տնտեսագիտական համալսարանի Երևանի կրթա-գիտական ինստիտուտ, ԵՊԲՀ) 60 ուսանող-մարզիկներ։ Այս մասին տեղեկացրեց ՀՊՏՀ ֆիզդաստիարակության, ԱԻ և քաղպաշտպանության ամբիոնի ղեկավար Հովհաննես Գաբրիելյանը, ով նաև մեր համալսարանի ձյուդոյի բաժանմունքի վարիչն է:

ՀՊՏՀ կառավարման ֆակուլտետի ուսանող Հարություն Աբրահամյանը 90 կգ քաշային կարգում  զբաղեցրել է առաջին հորիզոնականը, իսկ 66 կգ և 81 կգ   քաշային կարգերում համապատասխանաբար 3-րդ տեղն են զբաղեցրել  ՀՊՏՀ ուսանողներ   Անդրանիկ Մարգարյանը  (Գյումրու մասնաճյուղ)  և  Դավիթ Մաթևոսյանը (կառավարման ֆակուլտետ):

Հավելենք, որ այսօր տեղի կունենան 18-րդ հանրապետական ուսանողական մարզական խաղերի ֆուտզալի տղաների առաջնության եզրափակիչ խաղերը, որոնցով և կամփոփվի մարզական խաղերի գարնանային փուլը (մարզական խաղերի առաջնությունները կշարունակվեն և կեզրափակվեն գալիք ուստարում, աշնանը):

Շնորհավորում ենք մեր մարզիկներին և մաղթում նոր հաջողություններ:

Լուսանկարները  տրամադրել է Հովհաննես Գաբրիելյանը:

ՀՊՏՀ Լրատվության և հասարակայնության հետ կապերի բաժին