ՀՊՏՀ-ն՝ համաքաղաքային շաբաթօրյակի մասնակից

 Համաքաղաքային շաբաթօրյակը մեր մայրաքաղաքը մաքրելու, բարենորոգելու, կանաչապատելու հրաշալի հնարավորություն է: Քաղաքապետարանի կոչն այսօր Երևանի փողոցներ էր դուրս բերել մեր բազմաթիվ համաքաղաքացիներին և այդ թվում՝ Հայաստանի պետական տնտեսագիտական համալսարանի ղեկավարությանը, աշխատակիցներին և ուսանողներին:

Վաղ առավոտից ռեկտոր Կորյուն Աթոյանի գլխավորությամբ, վարչատնտեսական աշխատանքների գծով պրոռեկտոր Միխաիլ Կարապետյանից ստանալով հանձնարարություններ և անհրաժեշտ պարագաներ՝ աղբահավաքության պարկեր, ձեռնոցներ, փոցխեր ու բահեր, գործի անցան շաբաթօրյակի բոլոր մասնակիցները:

Դեկանները, տնտեսական մասի աշխատակիցները, դասախոսները, ուսանողները համալսարանի հարակից տարածքում կատարեցին սանմաքրման և բարեկարգման աշխատանքներ, ծառատունկ՝ այդպիսով իրենց ավանդը ներդնելով մեր սիրելի քաղաքի գեղեցկացման, միջավայրի առողջացման ու բարձր տրամադրություն ապահովելու գործում: