ՀՊՏՀ-ականները մասնակցել են 198 ավագ դպրոցում կազմակերպված միջոցառմանը
![](https://asue.am/images/1521864922/6a107939f7c26851b2a3b9d7.jpg)
Տնտեսագիտական մայր բուհի և ավագ դպրոցների համագործակցության ծրագրի շրջանակում այսօր մեր ներկայացուցիչները՝ ծրագրի համակարգող, լեզուների ամբիոնի դասախոս Լուսինե Կարագուլյանը, մարքեթինգի և բիզնեսի կազմակերպման ֆակուլտետի դեկանի տեղակալ Կարմեն Գրիգորյանը, տնտեսագիտության տեսության ամբիոնի դոցենտ Մուշեղ Հակոբյանը, ֆինանսների ամբիոնի ասիստենտ Լուսինե Հարությունյանը, ուսանողուհիներ Նարե Աբրահամյանը և Մարիետտա Բաղդասարյանը Երևանի 198 ավագ դպրոցի (տնօրեն՝ Արտաշես Թորոսյան) հրավերով հյուրընկալվել և մասնակցել են դպրոցի նախաձեռնած «Հայտնի տնտեսագետներ» խորագրով միջոցառմանը:
Զեկուցումներով հանդես են եկել տնտեսագիտական հոսքի 10-11-րդ դասարանների աշակերտները՝ խոսելով անվանի տնտեսագետների գործունեության մասին: Միջոցառման 2-րդ հատվածում աշակերտները ներկաներին խնդրել են ներկայացնել իրենց տեսակետները հետևյալ հարցի շուրջ «Ինչպիսի գործունեություն կծավալեին նշված տնտեսագետները Խորհրդային միության և այսօրվա իրականությունում» և համեմատական վերլուծություն կատարել: Խաղ-մտագրոհին ակտիվ մասնակցել են ՀՊՏՀ ներկայացուցիչները և հարցը քննարկել մասնագիտական տեսանկյունից:
![](https://asue.am/images/1521617881/11e4b34e37c95e14326ac7f1.jpg)
Ինչպես մեզ տեղեկացրեց Լուսինե Կարագուլյանը՝ այս հետաքրքիր նախաձեռնության հեղինակներն են պատմության ուսուցչուհիներ Արմինե Ասլիբեկյանն ու Աննա Նիազյանը:
Նախատեսվում է առաջիկա օրերին նշված դպրոցի աշակերտներին հրավիրել ՀՊՏՀ՝ մասնակցելու նույն ձևաչափի միջոցառման, ինչպես նաև ունկնդրելու մեր դասախոսների բանախոսությունները:
Լուսանկարները տրամադրել են դասախոսները:
ՀՊՏՀ Լրատվության և հասարակայնության հետ կապերի բաժին