Պավել Կլիբերը այցելել է ՀՊՏՀ Գյումրու մասնաճյուղ
«Էրազմուս+»-ով Տնտեսագիտական համալսարան եկած Պոզնանի տնտեսագիտության և բիզնեսի համալսարանի դասախոս Պավել Կլիբերն այսօր այցելել է համալսարանի Գյումրու մասնաճյուղ, հանդիպել ուսանողների և պրոֆեսորադասախոսական կազմի հետ, հանդես եկել դասախոսությամբ: Արտասահմանցի հյուրին ընդունել է մասնաճյուղի տնօրեն, պրոֆեսոր Սամսոն Դավոյանը, այնուհետև նրանք Գյումրու տեղեկատվական տեխնոլոգիաների կենտրոնում, մասնաճյուղի ուսանողների և կենտրոնի սաների համար հանդես են եկել դասախոսություններով: Մասնավորապես, Պավել Կլիբերը ելույթ է ունեցել «Ֆինանսական մաթեմատիկա» թեմայով՝ անդրադառնալով ֆինանսական հիմնական գործիքներին, Սամսոն Դավոյանը՝ «Երկրների բազմաբնույթ վերափոխումների համեմատական արդյունավետության գնահատումը և վերլուծությունը» զեկուցմամբ:
Այս մասին հայտնում են հանդիպումը նախաձեռնած և հրավիրյալ դասախոսին մասնաճյուղ ուղեկցած արտաքին կապերի բաժնի մեր գործընկերները՝ հավելելով, որ արտասահմանցի դասախոսն իր հիացմունքն է հայտնել ՀՊՏՀ ուսանողների մասին՝ բնութագրելով նրանց ակտիվ, հետաքրքրասեր ու բանիմաց:
Հիշեցնենք, որ օրերս մեր համալսարանում նա մի քանի դասախոսություն է կարդացել, պատասխանել ուսանողների հարցերին:
ՀՊՏՀ Լրատվության և հասարակայնության հետ կապերի բաժին