Մեր ասպիրանտը՝ միջազգային գիտաժողով-սեմինարի մասնակից
ՀՊՏՀ վիճակագրության ամբիոնի ասպիրանտ Աստղիկ Հովհաննիսյանը նոյեմբերի 29-ից դեկտեմբերի 7-ը Վրաստանում (Միսկցիելի) մասնակցել է միջազգային գիտաժողով-սեմինարի, որի կազմակերպիչ-ֆինանսավորողներն էին «Էրասմուս+» ծրագիրը և Գերմանիայի Ազգային գործակալությունը, կազմակերպիչը՝ Եվրոպական միջմշակութային ֆորումը, հյուրընկալող կազմակերպությունները՝ Վրաստանի Խաղաղության և զարգացման ակադեմիան և Հայաստանի Դիլիջանի երիտասարդության համագործակցության կենտրոնը:
Ծրագիրը բաղկացած է եղել առցանց մոդուլներից և երկու հանդիպումներից՝ Հայաստանում և Վրաստանում: Հայաստանում սեպտեմբերին կայացած հանդիպմանն անդրադարձել էինք ավելի վաղ: Հիշեցնենք, որ ծրագրում մրցութային կարգով ընդգրկված են եղել երիտասարդ հետազոտողներ Հայաստանից, Վրաստանից, Թուրքիայից, Ուկրաինայից, Հունգարիայից, Ֆրանսիայից և Գերմանիայից:
Մեզ հետ զրույցում Աստղիկ Հովհաննիսյանն ասաց, որ Վրաստանում կայացած հանդիպման ժամանակ քննարկվել են ոչ ֆորմալ կրթությանն առնչվող հարցեր, և քանի որ ծրագրի գլխավոր նպատակն էր ապահովել երիտասարդների մասնակցությունը գլոբալ փոփոխություններին՝ մանակիցները կազմել են ոչ ֆորմալ կրթության իրականացման նախագծեր, ներկայացրել մեթոդները, քայլերը և այս համատեքստում քննարկել իրենց երկրի առանձնահատկությունները:
Ծրագրի մասնակիցները ստացել են հավաստագրեր:
ՀՊՏՀ Լրատվության և հասարակայնության հետ կապերի բաժին