ՀՊՏՀ մարզական ակումբը նոր շունչ կտա համալսարանական սպորտին
Համալսարանի ֆիզդաստիարակության, ԱԻ և քաղպաշտպանության ամբիոնը տարին սկսել է աշխատանքային նոր եռանդով: ՀՊՏՀ ռեկտոր Կորյուն Աթոյանի հրամանով, օրերս ամբիոնը հիմնադրել է մարզական ակումբ, որի առաքելությունը համալսարանական սպորտի զարգացումն է: Այն զբաղվելու է բուհական մարզական միջոցառումների կազմակերպմամբ, ուսանողներին նախապատրաստելու է հանրապետական խաղերին, աշխուժացնելու է միջբուհական համագործակցությունը և այլն:
Հասարակական հիմունքներով, մարզական ակումբի ղեկավար է նշանակվել վերոնշյալ ամբիոնի վարիչի պաշտոնակատար Հովհաննես Գաբրիելյանը:
«Ակումբը գործելու է մեր ամբիոնին կից, այն համակարգելու է գործող մարզական բաժանմունքների աշխատանքը, համախմբելու է ինչպես մարզասեր ուսանողներին, այնպես էլ դասախոսներին, աշխատակիցներին: Արդեն ուրվագծել ենք առաջիկա միջոցառումները. փետրվարի սկզբին կանցկացնենք ավանդական դարձած «Դասախոսական գավաթ» միջբուհական առաջնությունը, այնուհետև կկազմակերպենք նաև ներբուհական «Դասախոսական գավաթ»: 2-րդ կիսամյակում շեշտը կդնենք ուսանողների մարզավիճակի բարելավման վրա, կպատրաստվենք միջբուհական առաջնություններին: Անելիքները շատ են, հուսով ենք՝ ակումբը նոր որակ կհաղորդի համալսարանական մարզական կյանքին»,-նշեց Հովհաննես Գաբրիելյանը:
ՀՊՏՀ Լրատվության և հասարակայնության հետ կապերի բաժին