Միջոցառումներ՝ նվիրված մայրաքաղաքի տոնին

Հոկտեմբերի 8-ին  «Երևան՝ արևի քաղաք» կարգախոսով կանցկացվի «Էրեբունի-Երևան-2798» տոնակատարությունը: Մայրաքաղաքի տոնի առիթով ՀՊՏՀ ուսխորհրդականներն այսօր կազմակերպեցին խորհրդանշական միջոցառումներ:

Հաշվապահական հաշվառման և աուդիտի ֆակուլտետի ՈւԽ նախաձեռնությամբ երկար դասամիջոցին բակում հայկական  ավանդական ուտեստների և մրգերի  հյուրասիրություն էր. պասուց տոլմա, փոխինդ, գաթա, հալվա, մեղր, լավաշ, նուռ, խաղող… ուսանողներն իրենց ձեռքերով էին  պատրաստել ամենը և հայկական տարազներով հյուրասիրում էին: Շնորհալի ուսանողուհի Սուսաննա Նաջարյանը կատարում էր «Հեյ ջան, Երևան» երգը:

Ֆակուլտետի ՈւԽ նախագահ Վիգեն Հարությունյանը մեզ հետ զրույցում ասաց, որ «Էրեբունի-Երևան»-ի տոնն ամեն տարի համալսարանում նշանավորելը գեղեցիկ ավանդույթ  է դարձել, միջոցառման կազմակերպմանն ակտիվորեն ներգրավվել են 1-ին կուրսեցիները:

Կառավարման ֆակուլտետի ուսխորհուրդը դասերի ավարտից հետո կինոդիտում  կազմակերպեց՝ ուսանողներին համախմբելով «Մեր բակը-1»  ֆիլմի շուրջը: Ֆիլմի ցուցադրությունից առաջ ուսանողուհիները  մայրաքաղաքին նվիրված երգ կատարեցին: Կինոդիտումը հաճելի հիշողություններ արթնացրեց. առաջին անգամ ֆիլմը ցուցադրվել է 1997թ. Ամանորի գիշերը: «Մեր բակը»  Երևանի մասին պատմող ֆիլմերից է և կոչ է անում սիրել մեր մայրաքաղաքը:

Շնորհավոր տոնդ, արևի' քաղաք:

ՀՊՏՀ Լրատվության և հասարակայնության հետ կապերի բաժին