Ավարտական աշխատանքների պաշտպանություններ՝ հեռակա բակալավրիատում

Ավարտին է մոտենում 2015-2016 ուսումնական տարին: Այս օրերին բուհում մթնոլորտը քննական է. առկա բակալավրիատի և մագիստրատուրայի տարբեր կուրսերի ուսանողները ամփոփիչ քննություններ են հանձնում, իսկ հեռակա ուսուցման համակարգի բակալավրիատի  ավարտական՝ 5-րդ կուրսերի ուսանողները պաշտպանում են դիպլոմային աշխատանքներ (առկայում դիպլոմային աշխատանքների և մագիստրոսական թեզերի պաշտպանություններն ավարտվել են մայիսի վերջին):

Լրատվության և հասարակայնության հետ կապերի բաժինն այսօր  շրջել է ֆակուլտետներով, արձանագրել ավարտական աշխատանքների պաշտպանություններից ակնթարթներ:  Զրուցել ենք  հաշվապահական հաշվառման և աուդիտի ֆակուլտետի դեկան Աշոտ Մաթևոսյանի և ֆինանսական ֆակուլտետի դեկան Վահե Միքայելյանի հետ, ովքեր ներկայացրել են իրենց տպավորությունները:

Դեկան Աշոտ Մաթևոսյանը նշեց, որ այսօր հաշվապահական հաշվառում (ըստ ճյուղերի)  մասնագիտությամբ պաշտպանել է 11 ուսանող, որից 2-ն արժանացել է գերազանց գնահատականի: Դեկանն ընդգծեց  մի առանձնահատկություն. հեռակա ուսուցման համակարգում ուսանողների մեծ մասն աշխատում է մասնագիտությամբ (մասնավորապես, իր ֆակուլտետում), ինչի շնորհիվ  նրանք լավ են պատկերացնում ոլորտը և կատարում են մասնագիտական խորը վերլուծություններ:

«Այսինքն, նրանց գիտելիքը զուտ տեսական չէ, նրանք գործնականորեն պատկերացնում են այն, ինչ ասում են, ի տարբերություն առկա համակարգում սովորողների, որոնք հիմնականում չեն աշխատում: Եղան աշխատանքներ, որոնք ամփոփիչ ատեստավորման հանձնաժողովի ուշադրությանն արժանացան թեմայի համակողմանի ներկայացման և  կիրառական առաջարկությունների համար: Այդ աշխատանքներն արժանացան գերազանց գնահատականի:  Ընդհանուր առմամբ, հանձնաժողովը գոհ է»,-ասաց դեկանը և հպարտորեն հավելեց, որ հաշվապահի պահանջարկը մեծ է, ուսանողների զգալի մասն  աշխատում են առաջատար կազմակերպություններում:

Ֆինանսական ֆակուլտետում այսօր աշխատանքներ են պաշտպանում բանկային գործ մասնագիտության ուսանողները: Դեկան Վահե Միքայելյանը ընդգրկված չէ նշված մասնագիտության ամփոփիչ ատեստավորման հանձնաժողովում, սակայն հետևել է պաշտպանությունների ընթացքին, ինչպես ինքն է նշում, իր ներկայությամբ քաջալերել է ուսանողներին: Դեկանը ներկայացրեց իր անկեղծ տպավորությունը:

«Հաճելիորեն զարմացա, երբ նկատեցի, որ ամբիոնի մոտ կանգնած ուսանողի ձայնը ակնհայտորեն վստահ երանգ ստացավ, երբ ես մտա լսարան:

Ես զգացի, որ իմ ներկայությունը ոգևորում է ուսանողներին: Լսել եմ լավ ելույթներ, սակայն հեռակայի ավարտական աշխատանքների պաշտպանությունների մասին  ընդհանրական կարծիք կարող ենք կազմել արդյունքների ամփոփումից հետո»,-նշեց Վահե Միքայելյանը:

Նշենք, որ հեռակա բակալավրիատում ավարտական աշխատանքների պաշտպանությունները կշարունակվեն ևս մեկ շաբաթ:

Ներկայացնում ենք  լուսանկարներ՝ տարբեր ֆակուլտետներում այս օրերին ընթացող պաշտպանություններից:

Բոլորին մաղթում ենք հաջողություն:

ՀՊՏՀ Լրատվության և հասարակայնության հետ կապերի բաժին