Հրապարակվել է «Ամբերդ» մատենաշարի 49-րդ համարը
ՀՊՏՀ «Ամբերդ» հետազոտական կենտրոնի նույնանուն մատենաշարի հերթական համարն արդեն հասանելի է առցանց հարթակում։
«Հայաստան-Չինաստան տնտեսական համագործակցության հեռանկարները «Մեկ գոտի, մեկ ճանապարհ» նախագծի շրջանակներում» թեմայով հետազոտությունը հեղինակել են Վարդան Աթոյանը (հետազոտական խմբի ղեկավար), Մերի Հովսեփյանը, Տաթևիկ Առուստամյանը և Նարինե Պետրոսյանը (հետազոտական խմբի անդամներ)։
Հետազոտությունը նվիրված է Հայաստանի և Չինաստանի տնտեսական համագործակցության հիմնախնդիրներին, ինչպես նաև «Մեկ գոտի, մեկ ճանապարհ» նախագծի նշանակությանը Հայաստանի և Հարավային Կովկասի երկրների համար:
Հեղինակային խմբի անդամները քննարկել են ԵԱՏՄ-Չինաստան տնտեսական համագործակցության շարժընթացը, վերլուծել հայ-չինական առևտրատնտեսական հարաբերությունները՝ ներդրումների, արտահանման, ներմուծման, զբոսաշրջության, մարդասիրական օգնության և այլ տեսանկյուններից, ինչպես նաև «Մեկ գոտի, մեկ ճանապարհ» նախաձեռնությանը Հայաստանի մասնակցության նախադրյալներն ու առկա խնդիրները:
Ուսումնասիրության արդյունքում բացահայտվել են Հայաստանի՝ նախագծին մասնակցության հիմնական ռիսկերը, խոչընդոտներն ու հնարավորությունները, մշակվել առաջարկներ, որոնք կարող են օգտակար լինել ոլորտի քաղաքականություն մշակողների և որոշում ընդունողների համար:
Հետազոտությունը հրատարակության է երաշխավորել ՀՊՏՀ գիտական խորհուրդը։
Մատենաշարը հասանելի է ՀՊՏՀ պաշտոնական կայքում։ Այն կարող եք ընթերցել հետևյալ հղումով։