ՀՊՏՀ-ում օրն սկսվեց երիտասարդական խանդավառությամբ. կամավորությանը նվիրված համաժողով և տոնավաճառ

«Արա ուրիշի համար, սովորիր քեզ համար». այս հավատամքով աշխարհում հազարավոր երիտասարդներ կամավորական գործունեություն են ծավալում, շատերն այն խելամտորեն դարձնում են կենսակերպ՝ ողջ կյանքում սովորելով ու փորձ քաղելով: Այսպես կոչված չվարձատրվող աշխատանքի յուրատեսակ վարձատրության արժեքն իմացողների մի ստվար հատվածի այսօր համախմբել էր Տնտեսագիտական մայր բուհը՝ Կամավորական հնարավորությունների համաժողով-տոնավաճառում: Կազմակերպել էին ՀՊՏՀ-ն (գործուն աջակցություն է ունեցել համալսարանի արտաքին կապերի դեպարտամենտը, շարունակական կրթության և վերապատրաստումների բաժինը), «Համախմբված երիտասարդական միություն» (նախագահ՝ ՀՊՏՀ ուսանող Անի Ղազարյան) և «Երիտասարդները հանուն փոփոխության» (նախագահ՝ Գրիգոր Ջանիկյան) ՀԿ-ները: Մասնակցում էին հայաստանյան մի շարք բուհերի ուսանողներ, ՀՊՏՀ ֆինանսատնտեսագիտական քոլեջի սաներ, ՀԿ ներկայացուցիչներ, ՀՊՏՀ աշխատակիցներ: Միջոցառումը բաղկացած էր 2 մասից՝ համաժողով, որտեղ բանախոսեցին ԱԺ երիտասարդ պատգամավորներ, հաջողակ ու փորձառու մասնագետներ, ովքեր երիտասարդներին ոգևորեցին իրենց հաջողության պատմությամբ, և տոնավաճառ, որտեղ միջազգային ու տեղական ՀԿ-ներ առաջարկում էին կամավորական, որոշները նաև վարձատրվող աշխատանք:

Համաժողով-տոնավաճառի բացումն ազդարարեց ՀՊՏՀ ռեկտորի պաշտոնակատար Դիանա Գալոյանը: Նա բարի գալուստ ասաց բոլորին՝ խոսնակներին ու ՀԿ-ներին, որոնք եկել էին կամավորությունը խրախուսելու, և ուսանողներին, որոնք հետաքրքրված են հասարակական աշխատանքով և նախընտրում են ինքնազարգացման այս ճանապարհը: Նա հատուկ շնորհակալություն հայտնեց միջոցառման համակազմակերպիչ, մեր ուսանող Անի Ղազարյանին: Բուհի ղեկավարը լիահույս է՝ կամավորությունը անփոխարինելի փորձառություն է, որը տալիս է գիտելիք, փորձ, հմտություն:

Կամավորությունն արժևորող խոսք ասաց Անի Ղազարյանը, ապա ներկայացրեց միջոցառման օրակարգն ու ամբիոնը տրամադրեց բանախոսներին:

Խոսնակներն էին Grow edutainment ընկերության համահիմնադիր և գործադիր տնօրեն Անուշ Մանուչարյանը, ՀՀ ԱԺ «Լուսավոր Հայաստան» խմբակցության պատգամավոր Աննա Կոստանյանը, որակավորված կառավարման խորհրդատու, դասընթացավար և մենթոր, IMS Armenia-ի գործադիր տնօրեն, Innovative Women Entrepreneurship-InWEnt-ի նախագահ Սիլվա Մեսրոպյանը և ՀՀ ԱԺ «Իմ քայլը» կուսակցությունների դաշինքի պատգամավոր Սոնա Ղազարյանը: Նրանք կամավորական աշխատանքի մեծ փորձ ունեն և ինչպես նշեցին ելույթներում՝ իրենց հաջողությունը խարսխված է նաև այն ոչ ակադեմիական գիտելիքի վրա, որը ստացել են կամավորության շնորհիվ: Խոսնակների հիմնական ուղերձը սա էր. մրցունակ մասնագետ դառնալու, աջակից ու կարեկցող, նախաձեռնող ու կազմակերպիչղ լինելու, բիզնես հմտություններ ձևավորելու, մարդկանց ճանաչելու և նրանց հետ լավագույնս հաղորդակցվելու և պարզապես գործնական գիտելիք ու փորձ ձեռքբերելու համար ամենալավ դպրոցներից մեկը կամավորությունն է, և ուրեմն՝ ի´ գործ, երիտասարդներ: Ոգևորիչ ելույթներից հետո սկսվեց տոնավաճառը: Բուհի հյուրընկալ նախասրահում կամավորական աշխատանքի առաջարկներով հանդես էին գալիս Կարմիր Խաչը, Համահայկական կամավորական միությունը, Ecolab Foundation-ը, FYCA-ն, EYP Armenia-ն, Future in our Hands-ը...թվով 13 կազմակերպություն: Նշենք, որ տոնավաճառին առանձին ներկայացված էր նաև ՀՊՏՀ-ն՝ իբրև ակադեմիական կենտրոն:

asue.am-ի հետ զրույցում Անի Ղազարյանն ասաց, որ «Համախմբված երիտասարդական միություն» ՀԿ-ն նախաձեռնել է ավելի քան հարյուր միջոցառում, և սա հերթականն է, որի գերնպատակը կրկին մեկն է՝ խթանել երիտասարդության մասնագիտական և անձնական աճը, մոտիվացնել, կոչ անել, լինել ակտիվ, աջակցող, կամավոր:

asue.am-ը շրջել է տոնավաճառի մասնակից կազմակերպությունների տաղավարներով, զրուցել ՀԿ ներկայացուցիչների հետ: Երևանի Բրյուսովի անվան լեզվահասարակագիտական համալսարանի EVS կամավորական ծրագրի խորհրդատու Արմենուհի Սարգսյանը մեզ հետ զրույցում ասաց, որ իրենց ՀԿ-ն երիտասարդներին հնարավորություն է տալիս եվրոպական երկրներում կամավորության ծրագրի մասնակցելու, հիշարժան ու օգտակար փորձ ձեռք բերելու:

Կարմիր Խաչի կամավորներն էլ ուսանողներին առաջարկում էին առողջապահական բնույթի աշխատանքներ կատարել. մեզ հետ զրույցում տաղավարի ժպտադեմ աղջիկներն ասացին, որ Կարմիր Խաչը պատրաստում է արագահաս կամավորներ, որոնք հաճախ մարդկային կյանքեր են փրկում, դժվար իրավիճակներում կանգնում մարդկանց կողքին:

Վստահ ենք, որ կամավորություն մարդասիրական երևույթի հետ կապվող խանդավառությունը, որ այսօր տիրում էր ՀՊՏՀ պատերի ներքո, բարի շարունակություն կունենա՝ մեկնարկը դառնալով տարաբնույթ հանրօգուտ աշխատանքների:

ՀՊՏՀ Լրատվություն և հասարակայնության հետ կապերի բաժին