ՀՀ ԱԺ պատգամավորը ՀՊՏՀ-ում բաց դաս վարեց ՀՀ-ԵՄ հարաբերությունների մասին
ՀՀ Ազգային ժողովի «Իմ քայլը» խմբակցության պատգամավոր, եվրոպական ինտեգրման հարցերի մշտական հանձնաժողովի անդամ Սոնա Ղազարյանը ՀՊՏՀ ՄՏՀ ամբիոնի ասիստենտ, տնտեսագիտության թեկնածու Ալբերտ Հայրապետյանի հրավերով նոյեմբերի 28-ին հյուրընկալվեց մեր համալսարանում:
Պատգամավորին նախ հյուրընկալեց ՀՊՏՀ ռեկտորի պաշտոնակատար Դիանա Գալոյանը՝ ներկայացնելով համալսարանում բարեփոխումների ընթացքը, ձեռքբերումները, անդրադառնալով կարճաժամկետ դասընթացների ներդրմանը, կրթական ծրագրերի և փորձառությունների համակարգի արդիականացմանը: Սոնա Ղազարյանն իր հերթին շնորհակալություն հայտնեց հրավերի և հյուրընկալության համար և համագործակցության պատրաստակամություն հայտնեց:
Այնուհետև օրենսդիր մարմնի ներկայացուցիչը ՀՊՏՀ-ում իրականացվող ԵՄ Ժան Մոնե մոդուլի շրջանակներում ներդրված «ԵՄ ինստիտուտները և որոշումների կայացման մեխանիզմները» առարկայի շրջանակներում հանդես եկավ դասախոսությամբ՝ անդրադառնալով խորհրդարանական դիվանագիտության ձեռքբերումներին, ԵՄ համապարփակ և ընդլայնված համագործակցության համաձայնագրին և դրա շրջանակներում իրականացվող միջոցառումներին, մասնավորապես՝ ՀՀ օրենսդրության մոտարկմանը ԵՄ օրենքներին և իրավական ակտերին, ինչպես նաև ուսանողներին ամենաշատը հետաքրքրող հարցին՝ վիզաների ազատականացմանը:
Ալբերտ Հայրապետյանը asue.am-ի հետ զրույցում հանդիպումն արդյունավետ գնահատեց՝ նշելով, որ ուսանողները ստացան այնպիսի տեղեկատվություն, որը օբյեկտիվորեն չէին կարող ստանալ իրենից, ով տեսաբան-դասախոս է: Նա նաև նշեց, որ նման հանդիպումները հատկապես Ժան Մոնե ծրագրի շրջանակներում կլինեն շարունակական և հաճախ:
Հիշեցնենք, որ ՀՊՏՀ-ն առաջին անգամ իրականացնում է ԵՄ Ժան Մոնե ծրագիր, որի մեկնարկը տրվեց օրերս: Այս մասին մանրամասներին կարող եք ծանոթանալ այստեղ:
ՀՊՏՀ Լրատվության և հասարակայնության հետ կապերի բաժին