ՀՊՏՀ խորհուրդը որոշեց համալսարանը վերակազմավորել հիմնադրամի և դիմել լիազոր մարմնին

Հայաստանի պետական տնտեսագիտական համալսարանում այսօր կայացավ խորհրդի հերթական նիստը՝ խորհրդի նախագահ, «Համայնքների ֆինանսիստների միավորում» ՀԿ նախագահ Վահան Մովսիսյանի նախագահությամբ, որին մասնակցում էին խորհրդի 22 անդամներ:

Ողջունելով խորհրդի հարգարժան անդամներին՝ խորհրդի նախագահ Վահան Մովսիսյանը ներկայացրեց օրակարգը, որում ընդգրկված էր մեկ հարց՝ «Հայաստանի պետական տնտեսագիտական համալսարան» պետական ոչ առևտրային կազմակերպությունը «Հայաստանի պետական տնտեսագիտական համալսարան» հիմնադրամի վերակազմավորելու մասին: Մինչ օրակարգի հաստատումը խորհրդի անդամ Վահագն Խաչատրյանը բարձրաձայնեց ուսանողական խորհրդի կարգավիճակի հարցը՝ նշելով, որ երբ հաստատված չէ ՈՒԽ կանոնադրությունը արդյո՞ք ուսանողների մասնակցությամբ խորհրդի նիստի անցկացումը տեղին է: Խորհրդի անդամները, այդ թվում՝ կրթության, գիտության, մշակույթի և սպորտի նախարարության ներկայացուցիչներ, պարզաբանեցին, որ իրավական որևէ խնդիր չկա, քանի որ խորհրդի կազմում ընդգրկված են բուհի ուսանողներ, որոնց թեկնածությունը հաստատել է կառավարությունը, և հարցը որևէ կերպ չի առնչվում ուսանողական ինքնակառավարման մարմինների կանոնադրությունների հաստատմանը:

Այնուհետև քննարկվեց օրակարգում ընդգրկված հարցը, որի համատեքստում` հիմնադրամի կանոնադրությունը: Խորհրդի գրեթե բոլոր անդամները հանդես եկան մի քանի տասնյակ առաջարկություններով ու հարցադրումներով, որոնց առնչությամբ պարզաբանումներ և բուհի մոտեցումները ներկայացրեցին խորհրդի նախագահ Վահան Մովսիսյանը և ռեկտորի պաշտոնակատար Ռուբեն Հայրապետյանը:

21 կողմ, 1 ձեռնպահ քվեարկությամբ խորհուրդը որոշեց «Հայաստանի պետական տնտեսագիտական համալսարան» պետական ոչ առևտրային կազմակերպությունը վերակազմավորել «Հայաստանի պետական տնտեսագիտական համալսարան» հիմնադրամի, ինչպես նաև մեկամսյա ժամկետում դիմել ՀՀ կրթության, գիտության, մշակույթի և սպորտի նախարարություն՝ «Հայաստանի պետական տնտեսագիտական համալսարան» պետական ոչ առևտրային կազմակերպությունը «Հայաստանի պետական տնտեսագիտական համալսարան» հիմնադրամի վերակազմավորելու մասին խորհրդի համապատասխան որոշումը Հայաստանի Հանրապետության կառավարության քննարկմանը ներկայացնելու համար:

ՀՊՏՀ Լրատվության և հասարակայնության հետ կապերի բաժին