ՀՊՏՀ աշխատակիցը՝ մասնագիտական նոր ձեռքբերումներով
Մեր համալսարանի պրոֆեսորադասախոսական կազմի ու աշխատակիցների հաջողություններն ու ձեռքբերումները մեզ համար ոգևորության ու հպարտության առիթ են, և վստահ ենք՝ նույնպիսի զգացումներով են համակում մեր ընթերցողին:
Այսօր՝ հերթականը. ՀՊՏՀ տեղեկատվական տեխնոլոգիաների կենտրոնի աշխատակից, համակարգչային համակարգերի ճարտարագետ Արման Օհանյանը «Մայքրոսոֆթ» համաշխարհային կորպորացիայի կողմից արժանացել է տվյալների բազայի օպտիմալացման, անվտանգության, անխափան հասանելիության ապահովման մասնագետի միջազգային որակավորման և ստացել հավաստագիր:
Հիշեցնենք, որ շուրջ մեկ տարի առաջ Արմանն արժանացել էր տվյալների բազայի ստեղծման ու նախագծման որակավորված մասնագետի հավաստագրի: Ի դեպ՝ «Մայքրոսոֆթ» ընկերության հավաստագիրը հնարավորություն է տալիս աշխատելու արտերկրում:
Մեզ հետ զրույցում Արմանն ասաց, որ որակավորման բարձրացման իր ճանապարհն ինքնուրույն է անցնում՝ ինքնակրթությամբ, մասնագիտական էլեկտրոնային բազան անգլերեն ուսումնասիրելով, ինչի արդյունքում արդեն երկրորդ անգամ հաջողությամբ հանձնում է առցանց քննությունն ու նոր որակավորում ձեռք բերում:
«Տեղեկատվական տեխնոլոգիաների ոլորտը անընդհատ կատարելագործվելու ու արդիականանալու միտում ունի, ուստի ես նույնպես չեմ բավարարվում իմ գիտելիքներով ու ձեռբերումներով»,- ասաց Արմանը:
Շնորհավորում ենք Արման Օհանյանին ու սպասում ենք նրա շարունակական հաջողություններին:
ՀՊՏՀ Լրատվության և հասարակայնության հետ կապերի բաժին