ՀՊՏՀ գիտնականները՝ «Նժդեհյան ընթերցումներ» ծրագրի մասնակից
«Աշխարհազոր» երիտասարդական կրթական հասարակական կազմակերպությունը 2015թ. մարտ-սեպտեմբեր ամիսներին իրականացրել է «Նժդեհյան ընթերցումներ» խորագրով կրթական, ճանաչողական ծրագիրը, որը կազմակերպվել է «Հայացք ապագային-2014» երիտասարդական ցուցահանդեսի ընթացքում Հայաստանի երիտասարդական հիմնադրամի կողմից տրամադրած դրամաշնորհի շրջանակներում. այս մասին տեղեկացնում է ՀԵՀ պաշտոնական կայքը:
Ծրագրին մասնակցել են բազմաթիվ երիտասարդներ, ուսանողներ, տարբեր ՀԿ անդամներ։ Մեր բուհի դասախոսներ, կառավարման ամբիոնի պրոֆեսոր, փիլիսոփայական գիտությունների դոկտոր, պրոֆեսոր Վալերի Միրզոյանը, փիլիսոփայության և հայոց պատմության ամբիոնի վարիչ, փիլիսոփայական գիտությունների դոկտոր, պրոֆեսոր Արամ Սարգսյանը հանդես են եկել դասախոսություններով:
Ամեն շաբաթ կազմակերպվել են Գարեգին Նժդեհին նվիրված դասախոսություն-քննարկումներ, հայտնի նժդեհագետներ, փիլիսոփաներ, քաղաքական-հասարակական գործիչներ ներկայացրել են Նժդեհ մտավորականի, քաղաքական և ռազմական գործչի, հզորագույն ազգային գաղափարախոսի և փիլիսոփայի մտածողության ու գրական ժառանգության հիմնական ուղղությունները: «Նժդեհյան ընթերցումներ»-ն ամփոփվել է եռօրյա հայրենաճանաչողական արշավով դեպի Խուստուփ և ուխտագնացությամբ դեպի Վերնաշենի Սպիտակավոր Սուրբ Աստվածածին վանքի բակում գտնվող Գարեգին Նժդեհի գերեզման:
Լուսանկարը՝ ՀԵՀ պաշտոնական կայքից:
ՀՊՏՀ Լրատվության և հասարակայնության հետ կապերի բաժին