Շախմատի և վոլեյբոլի խաղերով մեկնարկեց «Ուսանողական աշուն-2014» մարզամշակութային փառատոնը (լուսանկարներ)
ՀՊՏՀ-ում այսօր մթնոլորտը մարզական էր. շախմատի և վոլեյբոլի (տղաներ, աղջիկներ) առաջնություններով մեկնարկեց «Ուսանողական աշուն-2014» մարզամշակութային փառատոնը, որն անց է կացվում ուսանողական խորհրդի նախաձեռնությամբ: Նշենք, որ այս տարի փառատոնը նվիրված է ՀՊՏՀ ուսանողական խորհրդի 20-ամյակին:
Առաջնություններին ներկա էին պրոֆեսորդասախոսական անձնակազմի ներկայացուցիչներ, աշխատակիցներ և ուսանողներ՝ ուսանողական խորհրդի գլխավորությամբ: Շախմատի առաջնությանը ներկա գտնվեց նաև համալսարանի ռեկտոր Կորյուն Աթոյանը՝ իր ներկայությամբ խրախուսելով խաղի մասնակիցներին:
ՀՊՏՀ լրատվության և հասարակայնության հետ կապերի բաժնի հետ զրույցում ֆիզդաստիարակության, ԱԻ և քաղպաշտպանության ամբիոնի ժ/պ Հովհաննես Գաբրիելյանը կարևորեց բուհում միջֆակուլտետային մարզական խաղերի անցկացումը՝ նշելով, որ դրանք նախապատրաստում են ուսանողներին միջբուհական խաղերին:
«Մասնավորապես, եկող տարի հոկտեմբերին Երևանում կայանալու է Եվրոպայի շախմատի համալսարանական առաջնություն և շատ կարևոր է մեր հաջող մասնակցությունն այդտեղ»,-ասաց ամբիոնի ղեկավարը: Վերջինիս փոխանցմամբ՝ այսօր շախմատի և վոլեյբոլի աղջիկների առաջնությանը մասնակցում են թիմեր 6 ֆակուլտետներից, իսկ տղաների վոլեյբոլի առաջնությանը՝ 7 թիմ՝ ՀՊՏՀ 6 ֆակուլտետներից և Եղեգնաձորի մասնաճյուղից:
Այսօրվա խաղերի արդյունքներն այս պահին հայտնի չեն, դրանք մենք կհրապարակենք քիչ ավելի ուշ:
Միջֆակուլտետային մարզական խաղերի անցկացման ծրագրի համաձայն, վաղը՝ նոյեմբերի 11-ին, տեղի կունենա բազկամարտի տղաների առաջնություն:
Նշենք, որ «Ուսանողական աշուն-2014» մարզամշակութային փառատոնի հանդիսավոր բացումը տեղի կունենա նոյեմբերի 12-ին:
Շնորհավորում ենք բոլոր հաղթողներին:
ՀՊՏՀ Լրատվության և հասարակայնության հետ կապերի բաժին