ՀՊՏՀ-ում ավարտական (դիպլոմային) աշխատանքների պաշտպանություններ են
ՀՊՏՀ-ում ապրիլի 25-ին մեկնարկել են 2015-2016 ուստարվա առկա բակալավրիատի ավարտական կուրսերի դիպլոմային աշխատանքների պաշտպանությունները:
Այսօր ավարտական աշխատանքներ են պաշտպանում տնտեսության կարգավորման և միջազգային տնտեսական հարաբերությունների, հաշվապահական հաշվառման և աուդիտի, ֆինանսական ֆակուլտետների ուսանողները:
Առկա բակալավրիատում ավարտական աշխատանքների պաշտպանությունները կտևեն ապրիլի 25-ից մայիսի 26-ը, առկա մագիստրատուրայում մագիստրոսական թեզերի պաշտպանությունները կմեկնարկեն ապրիլի 28-ին և կտևեն մինչև մայիսի 26-ը, հեռակա բակալավրիատի (5-րդ կուրսեր) ավարտական աշխատանքների պաշտպանությունները կսկսվեն մայիսի 30-ին, կավարտվեն հունիսի 17-ին:
ՀՊՏՀ լրատվության և հասարակայնության հետ կապերի բաժինն այսօր հետևել է պաշտպանությունների ընթացքին, ունկնդրել մի քանի ելույթներ: Քննական լսարաններում անկաշկանդ մթնոլորտ է, ուսանողները փոքր-ինչ հուզված են, սակայն ելույթ են ունենում վստահորեն:
Միջազգային տնտեսական հարաբերություններ մասնագիտության 4-րդ կուրսում առաջինն աշխատանքը պաշտպանեց գերազանցիկ ուսանողուհի, ՀՊՏՀ անվանական կրթաթոշակառու Տաթևիկ Հովհաննիսյանը: «Տարածաշրջանային զարգացման բանկերի գործունեությունը և դրանց ներդրումային գործունեության գնահատումը համաշխարհային տնտեսությունում» թեմայով աշխատանքում Տաթևիկն ուսումնասիրել է տարածաշրջանային զարգացման բանկերի ներդրումային քաղաքականության հիմնական ուղղությունները, ինչպես նաև Հայաստանի և այս կառույցի համագործակցության ոլորտները: Հանձնաժողովը գոհունակություն հայտնեց նրա ելույթից, իսկ ընդդիմախոսը կարծիք էր հայտնել, որ աշխատանքն արժանի է գերազանց գնահատականի: Հաջորդիվ «Ծովային ելք չունեցող երկրների հիմնախնդիրները» (ՀՀ օրինակով) թեմայով աշխատանք ներկայացրեց ուսանողուհի Լաուրա Մաթասյանը:
Ներկայացնում ենք ակնթարթներ՝ 3 ֆակուլտետների ավարտական աշխատանքների այսօրվա պաշտպանություններից:
Ավարտական կուրսերի ուսանողներին մաղթում ենք հաջողություն:
ՀՊՏՀ Լրատվության և հասարակայնության հետ կապերի բաժին