ՀՊՏՀ-ն աշխուժացնում է կապերը արտադրական ոլորտի գործատուների հետ
![](https://asue.am/images/1698826256/a8408b4487909a1633ad9fae.jpg)
Հայաստանի պետական տնտեսագիտական համալսարանը ակտիվացնում է գործակցային կապերը արտադրական ոլորտի գործատուների հետ։ Այսօր ՀՊՏՀ ռեկտոր Դիանա Գալոյանը և «Յունիոն» ՍՊԸ զարգացման գծով տնօրեն Ռոբերտ Հովսեփյանը ստորագրեցին համագործակցության հուշագիր։ Նշված ՍՊԸ-ն իրականացնում է «Հայ կոլա» ապրանքանիշի արտադրությունը։
«Մենք կարևորում ենք արտադրության ոլորտի գործընկերների հետ կապերի հաստատումը՝ ի նպաստ մեր ուսանողների հմտությունների զարգացման, գործունակության բարձրացման։ Առհասարակ, տնտեսության ապագան արտադրության ոլորտում ենք տեսնում և անչափ կարևորում ենք այսպիսի գործընկերային կապերի հաստատումը»,- ասաց ՀՊՏՀ ռեկտորը։
![](https://asue.am/images/1698826256/e0bce2e706a42075372ca8eb.jpg)
Ընկերության ղեկավարը շնորհակալություն հայտնեց ընդունելության և արտադրության ոլորտի ներկայացուցիչների հետ համագործակցությունը կարևորելու համար, ապա հետաքրքրվեց՝ ուսանողներն ավելի շատ կառավարչակա՞ն, թե՞ արտադրական ոլորտում զբաղվածությանն են հակված։ Ի պատասխան ռեկտորը նշեց, որ ուսանողներն մեծապես հետաքրքրված են նաև արտադրության ոլորտով։
Կողմերը մեկնարկել են թափուր հաստիքների համալրման աշխատանքները, այսօր հստակեցվեց նաև գործընկեր կազմակերպությունում փորձառության անցկացման հարցը։