8-րդ նոր մագիստրոսական ծրագիրը ՀՊՏՀ-ում. «Բուժհաստատությունների կառավարում»

Դիտումների քանակ՝ 1026

Սիրելի դիմորդներ, գալիք տարվանից ՀՊՏՀ-ում ներդրվող մագիստրոսական նոր կրթական ծրագրերի շարքում ներկայացնում ենք 8-րդը, որը սակայն երկրորդն է՝ առողջապահության ոլորտում: «Բուժհաստատությունների կառավարում» (Dental practice managament) նոր MBA-ի կրթական ծրագրի հիմքը դրվել է 2020թ հունվարի 16-ին Հայաստանի պետական տնտեսագիտական համալսարանի և ««Ազգային բժշկական պալատ «ՄՄ»»  ՀԿ միջև համագործակցության հուշագրի ստորագրմամբ:

Այնուհետև գործընթացն ընդլայնվել է և դասընթացների ընթացքում ուսանողների փորձառությունները կազմակերպելու, դասավանդման գործընթացում արհեստավարժ մասնագետներ ներգրավելու, ինչպես նաև ստոմատոլոգիայի բնագավառում ժամանակակից բժշկական տեխնոլոգիաներին և գրադարանային ռեսուրսներին հասանելիություն ապահովելու նպատակով Հայաստանի պետական տնտեսագիտական համալսարանը ««Ազգային բժշկական պալատ «ՄՄ»»  ՀԿ միջոցով համագործակցություն է հաստատել ստոմատոլոգիական ծառայություններ մատուցող առաջատար կազմակերպությունների և «Հանրապետական գիտաբժշկական գրադարան» ՊՈԱԿ-ի հետ։

Համաձայն կնքված հուշագրերի, MBA-ի նոր՝ Dental practice management նեղ մասնագիտացմամբ «Բուժհաստատությունների կառավարում» կրթական ծրագիրը նպատակ ունի ապահովելու արդյունավետ համագործակցություն ստոմատոլոգիական ծառայություններ մատուցող բժշկական հաստատությունների և առողջապահության ոլորտի առաջատար հասարակական կազմակերպություններից մեկի հետ ինչպես կրթական գործընթացի կազմակերպման, այնպես էլ ծրագրի շրջանավարտների հետ հետագա համագործակցության առումով։

Նոր մագիստրոսական ծրագիրը կիրականացվի

  • ««Ազգային բժշկական պալատ «ՄՄ»» ՀԿ հետ համատեղ
  • 1 տարի ժամկետով
  • Ոլորտի լավագույն մասնագետների ներգրավմամբ
  • Նորագույն դասավանդման մեթոդների կիրառմամբ
  • Շաբաթական երկու անգամ
  • Ուրբաթ և շաբաթ օրերին, ժամը 16։00-20։00-ը
  • Դասընթացների ընթացքում կամ անմիջապես հետո գործատու կազմակերպություններում փորձառության անցկացմամբ

Սիրելի դիմորդներ, «Բուժհաստատությունների կառավարում» ծրագրի մանրամասները հասանելի են ՀՊՏՀ պաշտոնական կայքի (asue.am) «Դիմորդ» բաժնում, որին կարող եք ծանոթանալ այստեղ:

Նախորդ ծրագրերի մանրամասներին ևս կարող եք ծանոթանալ կայքի «Դիմորդ» բաժնում՝ հետևյալ հղումով:

Հավելենք, որ այս շրջանում ՀՊՏՀ-ում ներդրվող մագիստրոսական ծրագրերի վերաբերյալ բազում արձագանքներ ու նաև հարցեր ենք ստանում: Հարցերը հիմնականում վերաբերում են դիմելու կարգին, անհրաժեշտ պայմաններին: Ցանկանում ենք նշել, որ այդ մասին մանրամասներ կտրվեն ընդունելության գործընթացը մեկնարկելուն պես: Այնպես որ, հետևեք մեր կայքի և ֆեյսբուքյան էջի լուրերին:

ՀՊՏՀ Լրատվության և հասարակայնության հետ կապերի բաժին