Միջազգային վարպետ, ՀՊՏՀ ուսանող Տիգրան Հարությունյանի հերթական շախմատային հաջողությունը

Լիտվայում տեղի ունեցած Մաքս Զավանելիի շախմատային հուշամրցաշարում 15 երկրների շարքում (56 մասնակից) Հայաստանը ներկայացրած գրոսմայստերներ Գևորգ Հարությունյանը, Վահե Բաղդասարյանը և միջազգային վարպետ Տիգրան Հարությունյանը հաջողություններ են արձանագրել: 9 տուրից հետո Գևորգ Հարությունյանը և Բելառուսը ներկայացնող գրոսմայստեր Ալեքսեյ Ֆյոդորովը վաստակել են 7-ական միավոր և կիսել 1-2-րդ հորիզոնականները: Լրացուցիչ ցուցանիշների հաշվարկից հետո մրցաշարի հաղթող է դարձել Ֆյոդորովը, իսկ Հարությունյանը դարձել է երկրորդը: Տիգրան Հարությունյանը հաղթողներից հետ է մնացել կես միավորով և գրավել 3-րդ հորիզոնականը:
Մրցաշարում մեր 3-րդ ներկայացուցիչ Վահե Բաղդասարյանը 4 միավորով գրավել է 33-րդ հորիզոնականը:
Հայաստանի ուժեղագույն երիտասարդ միջազգային վարպետներից մեկը՝ Հայաստանի պատանեկան հավաքականի կազմում 2011թ համաշխարհային օլիմպիադայի փոխչեմպիոն, 2012թ. Աշխարհի և Եվրոպայի պատանեկան առաջնությունների մրցանակակիր, Հայաստանի պատանիների յոթակի չեմպիոն Տիգրան Հարությունյանը ՀՊՏՀ հանրային ֆինանսներ մասնագիտության հեռակա մագիստրատուրայի 2-րդ կուրսի ուսանող է:
Շնորհավորում ենք հերթական հաջողության առիթով:

ՀՊՏՀ Լրատվության և հասարակայնության հետ կապերի բաժին