Հանուն արդյունաբերական կրթության զարգացման. նոր համագործակցություն
Արդյունաբերական ոլորտի կրթության զարգացման, որակյալ կադրերի պատրաստման նպատակով ՀՊՏՀ-ն համագործակցություն է սկսել «Արմենիան Տիտանիում Փրոդաքշն» ընկերության հետ: Այսօր ՀՊՏՀ ռեկտորի պաշտոնակատար Դիանա Գալոյանն ընդունեց ընկերության գլխավոր տնօրենի տեղակալ Հրաչյա Ղազարյանին, ինչպես նաև ՀՊՏՀ միկրոէկոնոմիկայի և ձեռնարկատիրական գործունեության ամբիոնի ղեկավար, տ.գ.դ., պրոֆեսոր, ՀՀ ԱԺ պատգամավոր Միքայել Մելքումյանին:
ՀՊՏՀ ռեկտորի պաշտոնակատարն ու ընկերության փոխտնօրենը ստորագրեցին փոխըմբռնման հուշագիր: Ներկաները քննարկեցին տնտեսության արդյունաբերական ոլորտի զարգացմանը վերաբերող հարցեր, մտքեր փոխանակեցին ոլորտի համար որակյալ կադրերի պատրաստման գործընթացի շուրջ:
Հուշագիրը նախատեսում է համատեղ իրականացնել մագիստրոսական կրթական ծրագիր, կազմակերպել քննարկումներ, համատեղ գիտահետազոտական նախագծեր, գիտաժողովներ, ուսանողների փորձառության կազմակերպումն իրականացնել ընկերությունում:
ՀՊՏՀ Լրատվության և հասարակայնության հետ կապերի բաժին