ՀՊՏՀ աշխատակիցներն իրենց փորձը հարստացնում են արտերկրի համալսարաններում
«Էրազմուս+» ծրագրով դեկտեմբերի 4-8-ը ՀՊՏՀ բանկային գործի և ապահովագրության ամբիոնի ասիստենտ, տ.գ.թ. Հայկ Բեջանյանը վերապատրաստվել է Կրակովի տնտեսագիտական համալսարանում:
Առաջին օրը ՀՊՏՀ ներկայացուցիչը հանդիպել է Լեհաստանում Հայաստանի դեսպան Էդգար Ղազարյանին, մասնակից դարձել միջմշակութային միջոցառման (մի քանի երկրների ներկայացուցիչների մասնակցությամբ ցուցահանդես-վաճառք):
Կրակովի տնտեսագիտական համալսարանում մեր պատվիրակին ընդունել են միջազգային կապերի բաժնի աշխատակիցները, ծանոթացրել համալսարանի ստորաբաժանումներին, դասավանդման մեթոդոլոգիային:
Հայկ Բեջանյանը տպավորված է բուհի գրադարանով և այն բնութագրեց իբրև ժամանակակից ու գերհզոր:
Հաջորդիվ՝ ինֆորմացիոն տեխնոլոգիաների բաժնում աշխատակիցներ Վյաչեսլավ Բաբանին և Անդրեյ Բորոն պարզաբանել են իրենց աշխատանքի առանձնահատկությունները:
Հայկ Բեջանյանը տպավորված է նաև լեհական համալսարանի ուսանողական ինտերնետային պլատֆորմով, որը ուսանող-դասախոս երկխոսության ուրույն հարթակ է, և օժանդակում է ուսումնական գործընթացին: Ինֆորմացիոն տեխնոլոգիաների բաժնի աշխատակիցների հետ նա քննարկել է ՀՊՏՀ-ում նմանատիպ պլատֆորմ ստեղծելու հնարավորությունները:
Աշխատանքային վերջին օրը տնտեսագիտության թեկնածուն հանդիպել է մակրոէկոնոմիկայի ամբիոնի վարիչ, պրոֆեսոր Մարեկ Դոբրովսկուն, մասնակցել դասախոսության, որտեղ ներկայացրել է ՀՀ տնտեսությունը, անդրադարձել ընդհանուր մակրոտնտեսական իրավիճակին ու իրականացվող տնտեսական քաղաքականությանը: Ի դեպ, պրոֆեսորը լավ տեղեկացված է եղել հայերի ու Հայաստանի մասին:
Տարբեր ստորաբաժանումներում Հայկ Բեջանյանը ներկայացրել է ՀՊՏՀ գործունեությունը և ինչպես նշում է՝ մեր բուհի պաշտոնական կայքը և էլեկտրոնային գրադարանն արժանացել են լեհական բուհի գրադարանի աշխատակիցների հիացմունքին ու բարձր գնահատականին:
Այցելության ընթացքում մի շարք պայմանավորվածություններ են ձեռք բերվել, որոնք նախատեսում են լեհական համալսարանի ներկայացուցիչների այցը ՀՊՏՀ կամ համագործակցություն այլ ձևաչափերով: Օրինակ, առցանց ուսուցման կազմակերպման բաժնի գլխավոր մասնագետ Անետա Պովրոզնիկը խոստացել է Հայաստանում հեռահար ուսուցման ներդրման և զարգացման համար մասնագիտական աջակցություն տրամադրել:
Հայկ Բեջանյանը պատրաստ է ստացած փորձը ներդնել ՀՊՏՀ-ում և այս ուղղությամբ՝ արտաքին կապերի բաժնում ներկայացրել է իր առաջարկությունները:
Հիշեցնենք, որ ՀՊՏՀ-ում սույն միջազգային ծրագիրը համակարգում է արտաքին կապերի բաժինը:
ՀՊՏՀ Լրատվության և հասարակայնության հետ կապերի բաժին