Համագործակցություն՝ մեր բուհի և Ամերիկյան համալսարանի միջև. բնօգտագործման տնտեսագիտության ամբիոնը կկատարի փորձագիտական եզրակացություն

Դիտումների քանակ՝ 738

Տնտեսագիտական համալսարանի բնօգտագործման տնտեսագիտության ամբիոնի վարիչ, տ.գ.դ., պրոֆեսոր  Սուրեն Գևորգյանը և նշված ամբիոնի մի խումբ  դասախոսներ այսօր  մեր բուհում ընդունել են Հայաստանի ամերիկյան համալսարանի (ՀԱՀ) ներկայացուցիչներ, ՀԱՀ Պատասխանատու հանքարդյունաբերության կենտրոնի «Հանքարդյունաբերության օրենսդրության բարեփոխման նախաձեռնություն» (ՀՕԲՆ) ծրագրի ղեկավար Կարեն Ղազարյանին  և ծրագրի իրավական վերլուծաբան, համակարգող Մերի Գալստյանին:

Ինչպես մեզ հետ զրույցում ասաց Սուրեն Գևորգյանը, հանդիպման ընթացքում քննարկվել են  ՀՊՏՀ բնօգտագործման տնտեսագիտության ամբիոնի և ՀԱՀ Պատասխանատու հանքարդյունաբերության կենտրոնի միջև համագործակցությանն առնչվող հարցեր:

«Մասնավորապես, նշված կենտրոնը ցանկություն է հայտնել  մեզ հետ համագործակցելու՝ հանքարդյունաբերության ոլորտին առնչվող առկա հետազոտությունը մեր կողմից փորձագիտական եզրակացության ենթարկելու համար: Պայմանավորվածություն ձեռք բերվեց առաջիկայում կազմակերպել ևս մեկ հանդիպում՝ Ամերիկյան համալսարանում, որի ընթացքում կհստակեցվեն համատեղ անելիքները»,-ասաց բնօգտագործման տնտեսագիտության ամբիոնի ղեկավարը:

Նշենք, որ քննարկման ընթացքում մեր  դասախոսները հյուրերին ներկայացրել են ամբիոնի կողմից  մշակվող «Բնապահպանություն և բնօգտագործում» բակալավրիական   ծրագիրը, որը նախատեսվում է կիրառել 2016-2017 ուստարվանից:

ՀՊՏՀ Լրատվության և հասարակայնության հետ կապերի բաժին