Լիագումար 2-րդ նիստում. սահմանադրականությունն ու նորաստեղծությունը տնտեսական զարգացման համատեքստում
ՀՊՏՀ 25-րդ գիտաժողովի 2-րդ լիագումար նիստը համակարգում էր ՀՊՏՀ գիտության և արտաքին կապերի գծով պրոռեկտոր, պրոֆեսոր Գագիկ Վարդանյանը: Հնչեց երկու զեկուցում: «Երկրի սահմանադրականության սոցիալական և տնտեսական կողմերը» թեման ներկայացրեց ԵՊՀ տնտեսագիտության և կառավարման ֆակուլտետի դեկան, տ.գ.դ., պրոֆեսոր Հայկ Սարգսյանը, իսկ ՀՊՏՀ պրոռեկտոր Գագիկ Վարդանյանը հանդես եկավ «Տնտեսական զարգացման հիմքերը. գիտելիք և նորաստեղծություններ» թեմայով:
Հայկ Սարգսյանն անդրադարձավ սահմանադրական տնտեսագիտության տեսական դրույթներին՝ ներկայացնելով Ջեյմս Բյուքենենի, Տարոն Աճեմօղլու և այլ հեղինակների տեսակետները: Բացատրելով սահմանադրականության էությունը՝ զեկուցողն այն բնորոշեց որպես զարգացման այնպիսի մակարդակ, որի դեպքում սահմանափակված է պետական իշխանության կամայականության հնարավորությունը, այն զսպվում է մարդու իրավունքներով և իշխանական թևերի բաժանման մեխանիզմով, պետական իշխանությունը գործում է՝ արդյունավետորեն ծառայելով քաղաքացիների բարեկեցության անընդհատ բարձրացման վերջնանպատակին, հիմնական սահմանադրական արժեքներն ապրող իրողություններն են: Կատարելով սահմանադրականության գնահատում՝ բանախոսը ցույց տվեց սահմանադրականության գնահատման կառուցվածքային պատկերը, երկրները դասակարգեց ըստ սահմանադրականության կայունության նվազման, ներկայացրեց սահմանադրականության գնահատման տվյալների շտեմարաններ: Պրոֆեսորը վերլուծեց սահմանադրականության կատարման և տնտեսական աճի փոխկապվածությունը:
Զեկուցման ավարտից հետո հարցադրումներով հանդես եկան ՀՊՏՀ պրոֆեսորադասախոսական անձնակազմի ներկայացուցիչներ Սամվել Ավետիսյանը, Գրիգոր Կիրակոսյանը, Դիանա Գալոյանը և այլք:
ԵՊՀ տնտեսագիտության և կառավարման ֆակուլտետի դեկանն իր եզրափակիչ խոսքում առանձնակի արժևորեց տնտեսագիտական մայր բուհի՝ ՀՊՏՀ-ի դերը տնտեսության զարգացմանն ուղղված գիտական մշակումների կատարման առումով և կոչ արեց սերտ համագործակցության:
Լիագումար նիստի երկրորդ զեկուցող, պրոռեկտոր Գագիկ Վարդանյանը իր զեկուցմամբ նախ կանգ առավ տնտեսական աճի և տնտեսական զարգացման տարբերությունների վրա: Պրոֆեսորը ցույց տվեց տեխնոլոգիական փոփոխության և տնտեսական զարգացման կապը, նյութական արտադրությունից դեպի գիտելիքի անցումը և այլն:
Բանախոսը գիտելիքահենք տնտեսության դարաշրջանում կարևորեց մարդկային կապիտալի դերը, մատնանշեց գիտելիքահենք տնտեսության տարբերակիչ առանձնահատկությունները: Նորաստեղծությունների նախաձեռնության տեսանկյունից ևս ընդգծվեց գիտելիքի դերը, որի ըմբռնումից էլ ծնվում է նորը:
Ելույթի ավարտից հետո Գագիկ Վարդանյանը պատասխանեց ունկնդիրների հարցերին:
Լիագումար նիստը եզրափակեց ՀՊՏՀ ռեկտոր Կորյուն Աթոյանը՝ նշելով, որ հետաքրքիր քննարկում ծավալվեց:
«Ողջույնի խոսքում և' ես, և' վարչապետը կարևորեցինք այն, որ մենք պետք է համախմբենք տնտեսագիտական միտքը»,-ասաց ռեկտորը՝ կոչ անելով տնտեսագիտական հանրությանը՝ համախմբել ուժերը՝ ստեղծելու համար հավաքական կարծիք: Կորյուն Աթոյանը շեշտեց՝ քննադատական կարծիքներ միշտ էլ կան, բայց ուղղորդող, ուղենշող որևէ տեսակետ կառավարությանը չի ներկայացվել, ուստի փորձ է արվում այս ուղղությամբ որոշակի աշխատանք կատարել:
ՀՊՏՀ Լրատվության և հասարակայնության հետ կապերի բաժին