ՓՄՁ ոլորտին աջակցություն ցուցաբերելու հնարավորությունները՝ քննարկման առանցքում
«Փոքր և միջին ձեռնարկատիրություն: Գործունեություն: Աջակցություն». այս խորագիրն էր կրում ՀՊՏՀ 27-րդ գիտաժողովի 3-րդ կլոր սեղանը, որտեղ Հայաստանի փոքր և միջին ձեռնարկատիրությունների ոլորտի վերաբերյալ համապարփակ հետազոտություն ներկայացրեց «Ֆինանսական ներգրավվածություն» գիտաուսումնական լաբորատորիայի ղեկավար, տ.գ.դ., դոցենտ Սերգեյ Սուքիասյանը: Ներկա էին ՀՊՏՀ պրոռեկտոր Գագիկ Վարդանյանը, գիտության և ասպիրանտուրայի բաժնի պետ Խորեն Մխիթարյանը, միկրոէկոնոմիկայի և ձեռնարկատիրության գործունեության կազմակերպման ամբիոնի վարիչ, ԱԺ փոխնախագահ Միքայել Մելքումյանը, գիտաուսումնական լաբորատորիաների ղեկավարները, պրոֆեսորադասախոսական կազմի ներկայացուցիչներ, ասպիրանտներ, մագիստրանտներ:
Հատուկ հրավերով կլոր սեղանին մասնակցում էին ՀՀ ԿԲ սպառողների շահերի պաշտպանության ֆինանսական կրթման կենտրոնի ֆինանսական կրթման մասնագետ Աննա Սադոյանը և ԿԲ ֆինանսական համակարգի կայունության և զարգացման վարչության ֆինանսական կայունության մշտադիտարկման բաժնի պետ Կարինե Համբարյանը, ով նաև վերոնշյալ լաբորատորիայի փորձագետ է:
Բացման խոսքում Գագիկ Վարդանյանը, ՀՊՏՀ գիտական մտքի համախմբման, ներուժի բացահայտման տեսանկյունից կարևորեց գիտաժողովը, դրա շրջանակում անցկացվող կլոր սեղանները, ապա նշեց, որ մասնագիտական քննարկումների արդյունքում ակնկալվում է բյուրեղացնել մեր տնտեսության զարգացմանն ուղղված առաջարկություններ:
Պրոռեկտորն ուրախությամբ արձանագրեց, որ ՀՊՏՀ-ում ուժեղացվել է հետազոտական բաղադրիչը, և բուհը թևակոխել է գիտական նոր շրջափուլ:
Սերգեյ Սուքիասյանը զեկուցման մեջ վերլուծեց մեր երկրում ՓՄՁ-ների գործունեության առանձնահատկությունները, պաշտոնական վիճակագրություն ներկայացրեց ԱՁ-ների և ՍՊԸ-ների գրանցումների և լուծարումների վերաբերյալ: Բանախոսը մանրամասն պարզաբանեց ՓՄՁ-ներին տրամադրվող պետական աջակցության ուղղությունները, այս համատեքստում քննարկեց «Պետական աջակցության մասին» ՀՀ օրենքը, ՓՄՁ զարգացման ազգային կենտրոնի գործունեությունը, «ՓՄՁ ներդրումներ» ՈւՎԿ դերը:
ՓՄՁ սուբյեկտները դիտարկվեցին նաև որպես ակտիվ հարկ վճարողներ: Սերգեյ Սուքիասյանը զեկուցումն ամփոփեց ՓՄՁ-ներին լրացուցիչ աջակցություն տրամադրելու առաջարկություններով, որոնք հիմնականում վերաբերում էին սուբյեկտների ֆինանսական գրագիտության աստիճանի բարձրացման հնարավոր ուղիներին:
Ներկայացված հարցերի շուրջ դիտարկումներով հանդես եկան ՀՊՏՀ գիտնականները:
Միքայել Մելքումյանը կանգ առավ ՓՄՁ զարգացման հիմնախնդիրների վրա:
Նշենք, որ վաղը տեղի կունենան 2 կլոր սեղաններ, որով և գիտաժողովը կամփոփվի: Կայանալիք միջոցառումների հայտարարությանը ծանոթացեք այս հղումով՝ www.asue.am/am/էջեր-220//երկու-կլոր-սեղան-մեկ-օրում-3515:
ՀՊՏՀ Լրատվության և հասարակայնության հետ կապերի բաժին