Մայիսի 9-ին ընդառաջ՝ բաց դաս «Նժդեհ» ակումբի նախաձեռնությամբ

Դիտումների քանակ՝ 1009

Մայիսի 9-ին  ընդառաջ՝ այսօր ՀՊՏՀ ՈւԽ «Նժդեհ» ռազմահայրենասիրական  ակումբի նախաձեռնությամբ բուհի զոհված ազատամարտիկների անվան լսարանում կայացավ բաց դաս, որը նվիրված էր ՀՊՏՊ զոհված ուսանող-ազատամարտիկ Արթուր Կարապետյանի հերոսական կյանքին և մարտական գործունեությանը:

Նժդեհ ակումբի նախագահ Զավեն Խուկեյանը, ողջունելով ուսանողներին, ուրախությամբ նշեց,  որ ուսանողների մի հատված կա, որ միշտ ներկա է լինում  ակումբի նախաձեռնած միջոցառումներին, ինչը նշանակում է , որ նմանատիպ  միջոցառումներն արդեն ունեն ձևավորված  լսարան:

Միջոցառման  առաջին հատվածում ուսանողներն անդրադարձան Արթուր Կարապետյանին (1967-1991 թթ.), ներկայացնելով նրա կենսագրությունը, մարտական փառավոր ուղին: Ընկերասեր, բանիմաց ու խելացի, հայրենասեր…մի շարք վեհ արժանիքներով բնութագրեցին «Նժդեհ» ակումբի անդամները Արթուր Կարապետյանին՝ ընդգծելով, որ նա եղել է ՀՀ ազգային հերոս և Արցախյան պատերազմի մասնակից  Թաթուլ Կրպեյանի հավատարիմ ընկերն ու զինակիցը:1985  թվականին Արթուր Կարապետյանը  ընդունվել է Երևանի ժողովրդական տնտեսության ինստիուտի երեկոյան ուսուցման ֆակուլտետի առևտրի էկոնոմիկա մասնագիտության առաջին կուրս։ 1989թ., կիսատ թողնելով ուսումը, նա մեկնել է Արցախ և մասնակցել պատերազմին: Վերջին մարտը Արթուր Կարապետյանը մղել է Գետաշենում, որի պաշտպանությունը կազմակերպել և ղեկավարել  է իր զինակցի` Թաթուլ Կրպեյանի հետ։

Դասի երկրորդ հատվածում  անդրադարձ կատարվեց մայիսի 9-ի հերոսամարտերին, Շուշիի ազատագրմանը, «Հարսանիք լեռներում» օպերացիային:

ՀՊՏՀ Լրատվության և հասարակայնության հետ կապերի բաժին