Ասմունքում են ուսանողները. գրական ցերեկույթ՝ նվիրված Հովհաննես Շիրազի 100-ամյակին

Դիտումների քանակ՝ 1221

ՀՊՏՀ լեզուների ամբիոնի նախաձեռնությամբ այսօր մեր  բուհի Զորավար Անդրանիկի անվան նորաբաց  լսարանում անցկացվեց Հովհաննես Շիրազի (Օնիկ Կարապետյան) ծննդյան 100-ամյակին նվիրված գրական ցերեկույթ, որին մասնակցում էին նշված ամբիոնի վարիչի ժ/պ, բ.գ.թ., դոցենտ Սուսաննա Չալաբյանը, դասախոսներ, ուսանողներ:

Լեզուների ամբիոնի դասախոս Քնարիկ Ճոկլինյանը հանդես եկավ համառոտ գրական ակնարկով՝ ներկայացնելով Հովհաննես Շիրազի կյանքը (ծնվ. 1915թ.), գործունեությունը, ապա՝ բանաստեղծությունների ընդհանուր բնութագիրը: Շիրազին ներկայացնելով իբրև զգացմունքային բանաստեղծ՝ դասախոսը նշեց նրա քնարերգության հիմնական մոտիվները՝ սեր, մայր, բնություն, հայրենիք:

Դասախոսի ելույթից հետո ասմունքեցին ուսանողներն, ովքեր ընտրել էին Շիրազի հայրենասիրական հայտնի բանաստեղծությունները: Ուսանողների շուրթերից բանաստեղծությունը հնչում էր հեղինակին բնորոշ  զգացմունքայնությամբ ու կրքով:

Առանձնակի խանդավառությամբ ասմունքեց հաշվապահական հաշվառման և աուդիտի ֆակուլտետի ուսանող Տարոն Գրիգորյանը, ով առաջացրեց ունկնդիրների հիացմունքը: Գեղեցիկ ասմունքով աչքի ընկավ նաև ուսանողուհի Բելլա Ռաֆայելյանը:

Քնարիկ Ճոկլինյանի խոսքով՝ ցերեկույթը նպատակ ուներ ուսանողների մոտ մեծացնելու սերն ու հետաքրքրությունը գրականության, պոեզիայի նկատմամբ, ևս մեկ անգամ վերհիշելու մեծ հայրենասեր Շիրազի բանաստեղծությունները:

Միջոցառման ավարտին շնորհակալական խոսք ասաց Սուսաննա Չալաբյանը: «Սա այն բացառիկ պահերից է, երբ քեզ երջանիկ ես զգում. երջանիկ, որ ունենք  նման երիտասարդներ»,-ասաց ամբիոնի վարիչը:

Երախտագիտության խոսք ասաց նաև լեզուների ամբիոնի դասախոս, բ.գ.թ., դոցենտ Զուխրա Երվանդյանը՝ շնորհակալություն հայտնելով գեղեցիկ ակնթարթների համար, հատուկ գոհունակություն  հայտնելով ուսանող Տարոն Գրիգորյանին՝ բանաստեղծության թեմայի խորը ընկալման և հիանալի ասմունքի  համար:

Ասմունքող ուսանողները ամբիոնի կողմից նվեր ստացան գրքեր:

ՀՊՏՀ Լրատվության և հասարակայնության հետ կապերի բաժին