ՀՊՏՀ-ն՝ Համալսարանների եվրասիական ասոցացիայի անդամ

Դիտումների քանակ՝ 803

Ապրիլի 15-ին և 16-ին ՀՊՏՀ ռեկտոր Կորյուն Աթոյանը երկօրյա այցով գտնվում էր Սանկտ Պետերբուրգում՝ մասնակցելու Համալսարանների եվրասիական ասոցացիայի 13-րդ համագումարին և «Եվրասիական տնտեսական հեռանկարներ» 3-րդ միջազգային համաժողովին:

Համալսարանների եվրասիական ասոցացիայի հրավերով ՀՊՏՀ ռեկտորը ապրիլի 15-ին Սանկտ Պետերբուրգի պետական տնտեսագիտական համալսարանում մասնակցել է վերոնշյալ ասոցացիայի 13-րդ համագումարին, որտեղ քննարկվել են արդի պայմաններում ասոցացիայի անդամ համալսարանների համագործակցության հիմնական ուղղությունները, գործունեության կազմակերպական հարցերը:

Համալսարանների եվրասիական ասոցացիայի 13-րդ համագումարի որոշմամբ Հայաստանի պետական տնտեսագիտական համալսարանը դարձել է ասոցացիայի անդամ, և ռեկտոր Կորյուն Աթոյանին է հանձնվել այս իրադարձությունն ամրագրող դիպլոմը:

Ապրիլի 16-ին ռեկտոր Կորյուն Աթոյանը մասնակցել է «Եվրասիական տնտեսական հեռանկարներ» երրորդ միջազգային համաժողովին, որտեղ ելույթ է ունեցել ՀՀ Ազգային ժողովի նախագահ Գալուստ Սահակյանը:

Կրթական հարցերով կլոր սեղանին, որն ընթանում էր «Ընդհանուր մարդասիրական եվրասիական տարածքը վստահության համաշխարհային ճգնաժամի պայմաններում» խորագրով,  ռեկտորը ելույթ է ունեցել «ԵՏՄ երկրների բարձրագույն կրթության ինտեգրման հեռանկարները» թեմայով զեկուցմամբ:

ՀՊՏՀ Լրատվության և հասարակայնության հետ կապերի բաժին