Նոր նախաձեռնություն՝ ՀՊՏՀ լրատվության և հասարակայնության հետ կապերի բաժնից. ամփոփում ենք մարտ ամիսը՝ ՀՊՏՀ-ում

Հարգելի ՀՊՏՀ-ականներ, սիրելի ընթերցողներ, ՀՊՏՀ լրատվության և հասարակայնության հետ կապերի բաժինը հանդես է գալիս նոր նախաձեռնությամբ՝   լրատվության նոր ձևաչափով  ամփոփելով նախորդ ամսվա ուշագրավ իրադարձությունները ՀՊՏՀ-ում:

Այսուհետ յուրաքանչյուր ամսվա սկզբին  մեկ նյութով  կամփոփենք մեր համալսարանի՝ նախորդ ամսվա ընթացքում  կայացած խոշոր և նշանակալի իրադարձությունները, որոնք կարող են վերաբերել համալսարանական կյանքի բոլոր ոլորտներին՝ կրթություն, գիտություն, ուսումնական գործընթաց, միջազգային կապեր, ուսանողական կյանք, մշակույթ, ազատ ժամանց, սպորտ: Հուսով ենք, որ հատկապես հագեցած ամիսներին մեր մոտեցումը տեղին կլինի՝ հնարավորություն ընձեռելով մեր նյութի շրջանակներում վերհիշելու անցնող ամսվա հիմնական անցուդարձը:

Այսպիսով.

• Մարտ ամիսը ՀՊՏՀ առաջին կուրսեցիների համար սկսվեց հաճելի և բարի լուրով.

մարտի 3-ին Հայաստանի երիտասարդական հիմնադրամի հայտարարած կրթաթոշակի մրցույթի արդյունքների հիման վրա ՀՊՏՀ 113 ուսանող (այդ  թվում՝ 8-ը Եղեգնաձորի, 4-ը Գյումրու մասնաճյուղերից) արժանացավ ուսման վարձի մասնակի փոխհատուցման: Մարտի 4-ին ՀՊՏՀ ուսանողական խորհուրդը բուհի մեծ դահլիճում 1-ին կուրսեցիներին հանձնեց  կրթաթոշակի հավաստագրերը:

• Մարտի 4-ին Երևանի պետական կամերային թատրոնում կայացավ  ամենամյա «Հայկյան» մրցանակաբաշխությանը, որին ներկա է գտնվել ՀՀ Նախագահ Սերժ Սարգսյանը: ՀՊՏՀ ուսանողական խորհուրդը չորրորդ տարին անընդմեջ Հայաստանի երիտասարդական հիմնադրամի կազմակերպած «Հայկյան»
  մրցանակաբաշխությունում հաղթող ճանաչվեց «Լավագույն ուսանողական ինքնակառավարման մարմին» անվանակարգում և արժանացավ «Հայկյան» մրցանակի ու հավաստագրի: ՈւԽ ներկայացուցիչներին ընդունեց և շնորհավորեց ՀՊՏՀ ռեկտոր Կորյուն Աթոյանը:
• Նախորդ ամիս ազդարարվեց «Անգլախոսների ակումբ»-ի հիմնադրման մասին, որը համախմբում է անգլերենի իմացության բարձր մակարդակ ունեցող մեր բուհի ուսանողներին: Գործունեության մեկնարկը տրվեց մարտի 6-ին կայացած միջոցառմամբ. ՀՊՏՀ-ականների հյուրը ՀՀ ԿԲ ներկայացուցիչն էր:
• Մարտ ամսվա ընթացքում կայացան 2014-2015 ուստարվա ՀՊՏՀ գիտաուսումնական խմբերի 2-րդ միջանկյալ հաշվետվությունները: Սեմինարների ընթացքում բոլոր՝ 8 գիտաուսումնական խմբերը ներկայացրեցին իրենց ընթացիկ աշխատանքները:
• Մարտի 14-ին մեկնարկեցին ՀՀ բուհերի ուսանողների 16-րդ հանրապետական մարզական խաղերը: ՀՊՏՀ-ականները  մինչև այժմ կայացած 2 թիմային  առաջնություններում էլ  զբաղեցրել են 2 մրցանակային տեղ:
• Մարտի 17-ին ՀՊՏՀ ուսանողական խորհրդի նախաձեռնությամբ  բուհում մեկնարկեց  Հայոց ցեղասպանության 100-ամյա տարելիցին նվիրված միջոցառումների շարքը: Մեկնարկը տրվեց  «ԱՍԱԼԱ»-ի (Հայաստանի ազատագրության հայ գաղտնի բանակ)  լեգենդար մարտիկների հետ ՀՊՏՀ-ում հանդիպմամբ:
• Մարտի 18-ին Տնտեսագիտականը «Բաց դռների օրվա» շրջանակներում  հյուրընկալեց մի խումբ դպրոցականների, որոնց մեր պրոֆեսորադասախոսական կազմի ներկայացուցիչները  ներկայացրեցին ՀՊՏՀ-ն, կրթական ծրագրերը, համալսարանական կյանքը:
• Մարտի 19-ին ՀՊՏՀ մեծ դահլիճում Եվրասիական տնտեսական հանձնաժողովի մաքսային համագործակցության գծով կոլեգիայի անդամ (նախարար) Վլադիմիր Գոշինը հանդես եկավ «Եվրասիական ինտեգրման զարգացման և ԵՏՄ մաքսային օրենսդրության կատարելագործման հեռանկարները» թեմայով դասախոսությամբ:
• Մարտի 27-ին ՀՊՏՀ-ում «Հայ-իրանական տնտեսական հարաբերությունները» թեմայով դասախոսությամբ հանդես եկավ Հայաստանում ԻԻՀ արտակարգ և լիազոր դեսպան Մոհամմադ Ռեիսին:
• Մարտի 27-ին ՈւԽ նախաձեռնությամբ մեկնարկեց ուսանողական ժամանցային նոր նախագիծ՝ «ՀՊՏՀ դուետ»: Նախագծի շրջանակում մեր ուսանողները համերգային ելույթներ կունենան դուետներով:
• Մարտի 31-ին ՀՊՏՀ-ում կայացավ միջազգային գիտագործնական սեմինար՝ «Եվրասիական տնտեսական ինտեգրացման  հեռանկարները. հայացք Հայաստանից» խորագրով: Մեր բուհում հյուրընկալվել էին ներկայացուցիչներ՝ Ռուսաստանի Դաշնության ԱՊՀ երկրների ինստիտուտից, Եվրասիական տնտեսական հանձնաժողովից, ՌԴ ԳԱԱ Տնտեսագիտության ինստիտուտից, ՀՀ պետական կառույցներից, հետազոտական և գործարար շրջանակներից:

ՀՊՏՀ Լրատվության և հասարակայնության հետ կապերի բաժին