ՀՊՏՀ գիտնականները որպես փորձագետներ մասնակցում են խորհրդարանական լսումներին

ՀՊՏՀ, ինչպես նաև ՀՊՏՀ «Ամբերդ» հետազոտական կենտրոնի գիտնականները, որ ակտիվորեն ներգրավված են համապետական տնտեսական նախագծերի շուրջ քննարկումներում, այսօր մասնակցում են խորհրդարանական լսումներին: Նշենք, որ ՀՀ Ազգային ժողովում այսօր մեկնարկել են «Ելք» խմբակցության հեղինակած «ՀՀ մասով Եվրասիական տնտեսական միության պայմանագրի գործողությունը դադարեցնելու գործընթաց սկսելու վերաբերյալ» ԱԺ հայտարարության նախագծի վերաբերյալ խորհրդարանական լսումները:

Հիշեցնենք, որ սույն թվականի հուլիսի 21-ին մեր համալսարանի «Ամբերդ» հետազոտական կենտրոնի և ՀՀ ԱԺ տնտեսական հարցերի մշտական հանձնաժողովի միջև ստորագրվեց համագործակցության հուշագիր: Այն ստորագրել էին ՀՊՏՀ ռեկտոր, պրոֆեսոր Կորյուն Աթոյանը և խորհրդարանի նշված հանձնաժողովի նախագահ Խոսրով Հարությունյանը՝ վավերացնելով համագործակցություն, որով ՀՊՏՀ-ն հանդես է գալիս որպես ՀՀ ԱԺ տնտեսական հարցերի մշտական հանձնաժողովի փորձագիտական և խորհրդատվական գործընկեր: Ըստ այդմ՝ կողմերը նպատակ են հետապնդում տնտեսական քաղաքականության մշակման գործում օգտագործել  ՀՀ ԱԺ տնտեսական հարցերի մշտական հանձնաժողովին օրենքով վերապահված դերակատարումը և երկխոսություն ձևավորել տնտեսագիտական հանրույթի, քաղաքացիական ներկայացուցիչների և տնտեսական քաղաքականության մշակման պատասխանատուների միջև: Այսպիսով՝ «Ամբերդ» հետազոտական կենտրոնը հանդես է գալիս որպես ՀՀ ԱԺ տնտեսական հարցերի մշտական հանձնաժողովի գիտական խորհրդատու-գործընկեր:

ՀՊՏՀ Լրատվության և հասարակայնության հետ կապերի բաժին