Անգլախոսների ակումբի անդամները զարգացրեցին շնորհանդեսներ պատրաստելու հմտությունները. դասախոսություն ՀՊՏՀ-ում
ՀՊՏՀ նիստերի սրահում այսօր նորաստեղծ Անգլախոսների ակումբի գործունեության շրջանակներում հերթական հանդիպումն էր, հյուրերն էին Եղեգնաձորի մասնաճյուղի մի խումբ ուսանողներ, մասնաճյուղ հրավիրված անգլիացի դասախոս Բրայան Սալիբան, մասնաճյուղի տնօրեն Սոս Խաչիկյանը:
Բրայան Սալիբան հանդես եկավ «Ինչպես զարգացնել շնորհանդեսներ պատրաստելու հմտությունները» թեմայով դասախոսությամբ: Սկսելով «Դուք երբեք չեք ունենա առաջին տպավորություն թողնելու երկրորդ հնարավորությունը» հանրահայտ արտահայտությամբ (հեղ.՝ Կոկո Շանել)՝ բանախոսը շեշտեց, թե որքան կարևոր է շնորհանդեսը առաջին իսկ էջից ճիշտ
կառուցելու հանգամանքը, ունկնդիրների ուշադրությունը հենց սկզբից դեպի ներկայացվելիք նյութը գրավելը: Առանձին-առանձին նշվեցին և վերլուծվեցին այն նրբությունները, որոնք պետք է նկատի ունենալ շնորհանդեսներ պատրաստելիս: Դասախոսության ընթացքում ցուցադրվեցին թեմային առնչվող տեսանյութեր:
Վերջում ծավալվեց ակտիվ քննարկում՝ հարցուպատասխանի ձևաչափով:
Նշենք, որ ՀՊՏՀ Անգլախոսների ակումբը համախմբում է մեր բուհի անգլերենի իմացության բարձր մակարդակ ունեցող ուսանողներին: Այս հանդիպումն ակումբի 2-րդ նախաձեռնությունն էր, գործունեության մեկնարկը տրվել էր մարտի 6-ին, ՀՀ ԿԲ ներկայացուցչի հետ հանդիպմամբ:
ՀՊՏՀ Լրատվության և հասարակայնության հետ կապերի բաժին