«Ցանցային տնտեսություն» գիտաուսումնական խումբը հանդես եկավ 2-րդ միջանկյալ հաշվետվությամբ

ՀՊՏՀ նիստերի սրահում այսօր «Ցանցային տնտեսություն»  գիտաուսումնական խմբի երկրորդ  միջանկյալ հաշվետվությունն էր, որին ներկա էին գիտության և արտաքին կապերի գծով պրոռեկտոր Գագիկ Վարդանյանը, գիտության բաժնի պետ Խորեն Մխիթարյանը, պրոֆեսորադասախոսական կազմի ներկայացուցիչներ, բուհի  ծրագրավորման և տեխնիկական սպասարկման բաժնի աշխատակիցներ, ուսանողներ:

Գագիկ Վարդանյանը ողջունի խոսքում ընդգծեց  այս գիտաուսումնական խմբի առկայության կարևորությունը՝ նշելով, որ խմբի ձևավորումը պատահական չէր. ցանցային տնտեսության բնագավառի ըմբռնման դերը կարևոր է երկրի առաջընթացի համար: «Ցանցային տնտեսություն մուտք չգործող երկրները հետ են մնում առաջընթացից»,-շեշտեց Գագիկ Վարդանյանը:

Խմբի ղեկավար, տնտեսական ինֆորմատիկայի և տեղեկատվական համակարգերի ամբիոնի վարիչ, տ.գ.դ., պրոֆեսոր Վարդան Սարգսյանը ողջույնի խոսքում  ուրախությամբ նշեց, որ ՀՊՏՀ բոլոր գիտաուսումնական խմբերի մեջ ձևավորվում է համագործակցության դաշտ: Ղեկավարը ներկայացրեց խմբի կողմից իրականացվող աշխատանքների ընթացքը, առկա արդյունքները, ինչպես նաև հետազոտության ակնկալիքները:

ԳՈւԽ անդամներ՝  մագիստրանտ Լիննա Սարգսյանի, ասպիրանտ Ռաֆայել  Սեդրակյանի, մագիստրանտ Էլլա Աղաբաբյանի և տ.գ.թ.,դոցենտ Գրիգոր Արքելաթյանի կողմից  համապատասխանաբար, հնչեցին հետևյալ զեկուցումները. «ՏՀՏ ազդեցությունների ուսումնասիրությունը ՀՀ բիզնես միջավայրի վրա», «ՀՀ-ում ցանցային տնտեսության ձևավորման մոդելները և փոխազդեցությունները տնտեսական աճի հետ»,  «Ցանցային տեղեկատվական անվտանգության համակարգի ձևավորման խնդիրները ՀՀ-ում», «ՀՀ-ում առցանց աշխատաշուկայի զարգացման ռազմավարությունները»:

Քննարկումն ուղեկցվեց հարցադրումներով, նկատառումներով ու դիտարկումներով:

ՀՊՏՀ Լրատվության և հասարակայնության հետ կապերի բաժին