ՀՊՏՀ-ականները՝ «Տնտեսագիտության ժամանակակից հիմնահարցերը» խորագրով միջազգային գիտաժողովի մասնակից, տպագրվել են նրանց զեկուցումները
ՀՊՏՀ մագիստրանտներ, «Ազգային ինովացիոն համակարգ» գիտաուսումնական խմբի անդամներ Անի Հունանյանը և Անի Ավետիսյանը մասնակցել են երեկ ԵՊՀ տնտեսագիտության և կառավարման ֆակուլտետում մեկնարկած «Տնտեսագիտության ժամանակակից հիմնահարցերը» խորագրով միջազգային գիտաժողովին: Մեր բուհը ներկայացրած ուսանողներ Անի Հունանյանի, Անի Ավետիսյանի, ինչպես նաև ՀՊՏՀ ասպիրանտ Վարդան Ջանգոզյանի զեկուցումները, լավագույնների շարքում, տպագրվել են «Տնտեսագիտության ժամանակակից հիմնահարցերը» խորագրով միջազգային 3-րդ գիտաժողովի նյութերի ժողովածուում:
ՀՊՏՀ լրատվության և հասարակայնության հետ կապերի բաժնի հետ զրույցում Անի Հունանյանը նշեց, որ գիտաժողովին հանդես է եկել «ՀՀ տնտեսության գիտելիքահենք հատվածի ձևավորման հիմնախնդիրները» զեկուցմամբ, որտեղ անդրադարձել է գիտության ոլորտի և գիտելիքահենք տնտեսության հիմնախնդիրներին, խոչընդոտներին, մտավոր սեփականության իրավական հիմնախնդիրներին, ներկայացրել է գիտատեխնիկական գործունեության ցուցանիշները, գիտելիքահենք տնտեսության զարգացման հեռանկարը, հանդես է եկել առաջարկություններով:
Անի Ավետիսյանը «Բարձր տեխնոլոգիական հիմքի վրա տնտեսության դիվերսիֆիկացման հիմնախնդիրները» զեկուցման մեջ հանդես է եկել տնտեսության մեջ բարձր տեխնոլոգիաների և ՏՏ ոլորտի դերի և նշանակության վերաբերյալ վորլուծությամբ, ցույց տվել այդ ոլորտը՝ որպես ՀՀ տնտեսության բազմազանեցման մրցակցային առավելություն, մատնանշել ՏՏ և դեղագործական ոլորտի արտահանման հիմնական ցուցանիշները և արտահանման շուկաները:
Մեզ հետ զրույցում ուսանողները գիտաժողովին մասնակցությունը կարևորեցին միջբուհական համագործակցության, փորձի փոխանակման, համատեղ քննարկումների հնարավորության առումով: Անի Հունանյանը նշեց, որ նմանատիպ միջոցառումներին մասնակցությունը նպաստում է ուսանողի գիտահետազոտական աշխատանքների հմտությունների զարգացմանը:
ՀՊՏՀ ուսանողները մասնակցության համար ստացել են հավաստագրեր:
Նշենք, որ ուսանողների ղեկավարը տ.գ.թ., դոցենտ Ատոմ Մարգարյանն է:
ՀՊՏՀ Լրատվության և հասարակայնության հետ կապերի բաժին