Ֆլեշմոբ՝ նվիրված ՀՊՏՀ ուսանողուհիներին. հայտնի դարձավ նաև լուսանկարչական մրցույթի հաղթողը (լուսանկարներ)

Դիտումների քանակ՝ 657

ՀՊՏՀ բակում  այսօր մարտիության տոնական  մթնոլորտը  շարունակվեց դասամիջոցներին: Ուսանողական խորհուրդը, մատուցելով հերթական անակնկալը, բուհի ուսանողուհիների համար կազմակերպել էր ինքնատիպ ֆլեշմոբ՝ համեմված ջութակի կենդանի նվագակցությամբ և պարային կատարումներով: Բակում այսօր ցուցադրվում էին ՈւԽ կողմից նախապես հայտարարված «Պատկերի'ր գեղեցիկը» խորագրով   լուսանկարչական մրցույթի մասնակիցների լուսանկարները, որոնցում  արտացոլված էին կինը, մայրը, աղջիկը, գեղեցիկը:

Տոնական մթնոլորտը համախմբել էր բոլոր ֆակուլտետների ուսանողներին, նաև բուհի աշխատակիցներին:

ՀՊՏՀ լրատվության և հասարակայնության հետ կապերի բաժնի հետ զրույցում հաշվապահական հաշվառման և աուդիտի ֆակուլտետի 1-ին կուրսի ուսանողուհի  Սիրանույշ Ամիրյանն ասաց, որ նման ուշադրությունն իրենց հանդեպ շատ հաճելի է: «Ուսխորհրդի  նախաձեռնությունները շատ հետաքրքիր և յուրօրինակ էին: Վաղ առավոտից մեզ տարբեր անակնկալներ են մատուցվում: Հաճելի է, երբ օրդ տոնի է վերածվում և արժանանում ես այսպիսի ուշադրության»,-նշեց ուսանողուհին:

Ֆլեշմոբի ընթացքում ՈւԽ ներկայացուցիչները նաև հայտարարեցին կանանց տոներին նվիրված լուսանկարչական մրցույթի հաղթողի անունը. կառավարման ֆակուլտետի 2-րդ կուրսի ուսանողուհի Լուսինե Կիրակոսյանն է, ով լուսանկարում ներկայացրել  էր տարեց կնոջ՝ մոր  ձեռքեր: Մեզ հետ զրույցում նա նշեց, որ  մոր կոշտացած, բայց գեղեցիկ ձեռքերը ավելի քան արտահայտում են գեղեցիկը, ուստի իր լուսանկարում հենց այդ գեղեցկությունն է պատկերել: «Մոր ձեռքերը շատ բան են արտահայտում՝ սեր, քնքշություն, աշխատասիրություն, հոգատարություն …Շատ հաճելի է, որ հենց ի'մ լուսանկարը հաղթեց»,-նշեց Լուսինեն:

Լուսինե Կիրակոսյանը ուսանողական խորհրդի կողմից որպես մրցանակ ստացավ արտաքին կրիչ:

ֆլեշմոբի ավարտից հետո էլ բակը տոնական ու ջերմ էր: Ուսանողներն իրար ծաղիկներ էին նվիրում, շնորհավորում, ողջագուրվում…

Ահա այսպիսին էր կանանց միամսյակի մեկնարկը մեր բուհում:

Հաղթող լուսանկարը

ՀՊՏՀ Լրատվության և հասարակայնության հետ կապերի բաժին