Հայաստանի սեղանի թենիսի 2015թ. անհատական առաջնությանը մեր աշխատակիցը 6-րդ անգամ նվաճել է չեմպիոնի կոչումը

Դիտումների քանակ՝ 614

ՀՊՏՀ  ֆիզդաստիարակության, ԱԻ և քաղպաշտպանության ամբիոնի ուսումնական վարպետ Մեսրոպ Ղուկասյանը փետրվարի 21-ին և 22-ին կայացած Հայաստանի սեղանի թենիսի 2015թ. անհատական առաջնությանը  6-րդ անգամ   նվաճել է չեմպիոնի տիտղոսը:

Լրատվության և հասարակայնության հետ կապերի բաժնի հետ զրույցում Մեսրոպը  նշեց, որ  այս տարվա  առաջնությանը մասնակցելիս սկզբում  մի քիչ լարվածություն և այսպես ասած՝ մտավախություն կար, բայց հետո՝  արձանագրվեց հերթական նվաճումը: Ուսումնական վարպետը հաղթանակի է ձգտում տարբեր առաջնություններում և այժմ էլ  նախապատրաստվում է սեղանի թենիսի մեկ այլ խաղում լավագույնս հանդես գալու:

«Մարզական  հաղթանակներիս շարքը համալրվեց ևս մեկով, ինչի համար շատ ուրախ եմ: Նպատակ ունեմ մասնակցելու նաև այս ամռանը կայանալիք Համահայկական խաղերի  շրջանակներում անցկացվող սեղանի թենիսի առաջնությանը: Ի դեպ, այս առաջնությունում երկու անգամ նվաճել եմ 2-րդ տեղը, այժմ նպատակս 1-ին տեղի համար  պայքարելն է»,-ասաց բազմակի չեմպիոնը: Մեսրոպի գնահատմամբ՝ Հայաստանում սեղանի թենիս մարզաձևը  լավ հիմքերի վրա է, ցանկալի է, սակայն, որ այն ավելի զարգանա:

Մեսրոպ Ղուկասյանը այս տարի ևս Հայաստանի սեղանի թենիսի անհատական առաջնությունում  հաղթանակի համար արժանացել է ոսկե մեդալի, պատվոգրի և դրամական պարգևի:

Շնորհավորում ենք մեր աշխատակցին, մաղթում նորանոր մարզական նվաճումներ:

ՀՊՏՀ Լրատվության և հասարակայնության հետ կապերի բաժին