Արդյունավետ գործունեություն հնարավոր է իրականացնել միայն լավագույն կադրերով. ՀՊՏՀ-ի ու «Հայբիզնեսբանկի» համագործակցությունը շարունակվում է

Հայաստանի պետական տնտեսագիտական համալսարանի այսօրվա ռեկտորատը հյուրեր ուներ. համալսարանում էին «Հայբիզնեսբանկի» վարչության նախագահ Արսեն Միքայելյանն ու տեղակալ Մանվել Սահակյանը, ովքեր եկել էին կրթաթոշակի հավաստագրեր հանձնելու լավ սովորող, սոցիալապես անապահով ՀՊՏՀ 3 ուսանողների:

Ներկայացնելով հյուրերին՝ ՀՊՏՀ ռեկտոր Կորյուն Աթոյանը շնորհակալություն հայտնեց փոխգործակցության համար, ապա հայտնեց, որ Տնտեսագիտական համալսարանը համագործակցության պայմանագիր ունի Հայաստանի բանկերի միության հետ, առանձին բանկերի հետ էլ իրականացնում է առանձին համագործակցություն: «Առանցքում գործատուների պահանջներին համապատասխան, աշխատաշուկային անհրաժեշտ որակյալ կադրերի պատրաստումն է, ինչում շահագրգռված ենք ոչ միայն մենք, այլև գործատուներն այն իմաստով, որ լավագույն կադրերով է հնարավոր միայն կազմակերպել արդյունավետ գործունեություն, արդյունավետ աշխատանք»,-ասաց համալսարանի ռեկտորն՝ ընդգծելով նաև համագործակցությունը «Հայբիզնեսբանկի» հետ:

Կրթաթոշակի հավաստագրերը հանձնեց բանկի վարչության նախագահ Արսեն Միքայելյանը՝ նշելով, որ իրենք մեծ ուշադրություն են դարձնում լավ սովորող ուսանողներին և մեծ հաճույքով են նրանց տրամադրում կրթաթոշակի քարտեր: Նա նաև հայտնեց, որ իրենք նոր առաջարկ ունեն համալսարանին, որի արդյունքում ապագայում հնարավոր կլինի մեր համալսարանի լավ ուսանողներին կոնկրետ գործընթացի արդյունքում ընդունել բանկ` աշխատանքի: «Շնորհակալություն համագործակցության համար, ինձ համար սա մեծ պատիվ է»,- նշեց բանկի վարչության նախագահը: Ի պատասխան՝ ռեկտոր Կորյուն Աթոյանը շնորհակալություն հայտնեց, ապա առաջարկեց առաջիկայում ավելի հստակեցնել համագործակցության խորացման հնարավորությունները, ապա հորդորեց՝ համալսարանի ուսումնական ծրագրերի վերաբերյալ ներկայացնել առաջարկներ: Ռեկտորը նաև խոսեց բանկի լավագույն մասնագետներին մեր համալսարանում դասավանդման հնարավորություն տալու մասին:

Այնուհետև ռեկտորատն անցավ օրակարգային հարցերին: Դեկանները զեկուցեցին մինչև 12 կրեդիտ ակադեմիական պարտքով հաջորդ կուրս փոխադրված ուսանողների ակադեմիական պարտքերի վերահանձնման 1-ին և 2-րդ փուլերի արդյունքների մասին:

Օրակարգով նախատեսված հաջորդ՝ ՀՊՏՀ-ի և Ռոստովի տնտեսագիտական համալսարանի միջև կրկնակի դիպլոմների տրամադրման ծրագրի մասին հարցը զեկուցեց համալսարանի միջազգային տնտեսական հարաբերությունների ամբիոնի վարիչի պաշտոնակատար Գրիգոր Նազարյանը՝ նշելով, որ Ռոստովի տնտեսագիտական համալսարանը մեր համալսարանին է դիմել 3 մասնագիտությունների գծով կրկնակի դիպլոմներ տալու առաջարկով, ապա ներկայացրեց գործընթացին առնչվող մյուս հանգամանքները: Ռեկտորատի անդամները քննարկեցին հարցին վերաբերող մանրամասները,  իսկ ռեկտոր Կորյուն Աթոյանը հանձնարարեց հստակ ուսումնասիրել գործընթացի իրականացման կարգավորման հիմքերը, հնարավորությունները, այլ համալսարաններում առկա փորձը, խնդրին առնչվող բոլոր հարցերը:

Անդրադարձ եղավ ընթացիկ այլ հարցերի ևս:

ՀՊՏՀ Լրատվության և հասարակայնության հետ կապերի բաժին