Ռազմահայրենասիրական թեմաներով բաց դասեր՝ ուսանողների բանախոսությամբ. «Նժդեհ» ակումբի նոր նախաձեռնությունը

ՀՊՏՀ զոհված 13 ազատամարտիկների կյանքին, գործունեությանը ուսանողներն այսուհետ  քաջ ծանոթ կլինեն. «Նժդեհ» ռազմահայրենասիրական ակումբը հանդես է գալիս նոր նախաձեռնությամբ, որի մեկնարկը տրվեց այսօր: Բաց դասի ձևաչափով բուհում կանցկացվեն ՀՊՏՀ զոհված ազատամարտիկների կյանքին ու գործունեությանը նվիրված ցերեկույթներ: ՀՊՏՀ զոհված ազատամարտիկների անվան նորաբաց լսարանում այսօր անցկացված դասը նվիրված էր Դերենիկ Գարիկի Աբրահամյանին (Ատոմ, ծնվել է Գառնի գյուղում):

Ուսանողներին ողջունեցին  «Նժդեհ» ակումբի նախագահ Զավեն Խուկեյանը, ապա՝ փոխնախագահ Գրիգոր Ոսկերչյանը, այնուհետև  մարքեթինգի 2-րդ կուրսի ուսանողուհի Սոնա Ղազարյանի բանախոսությամբ ներկայացվեց զոհված ազատամարտիկի կյանքը, ուշագրավ փաստեր: Դերենիկ Աբրահամյանը (1968-1990թթ.) Երևանի ժողովրդական տնտեսության ինստիտուտի 3-րդ կուրսի ուսանող էր, երբ մեկնեց ու մասնակցեց Արցախյան շարժմանը: Ատոմը  1989 թվականին մի խումբ համախոհների հետ կազմավորել է «Նժդեհ» կամավորականների ջոկատը:

Դասի ընթացքում ցուցադրվեց նաև Ատոմին նվիրված տեսանյութ, ընթերցվեց նրա բանաստեղծություններից:

Նշենք, որ Նժդեհ ակումբի կողմից կազմակերպվող առաջին բաց դասը նվիրված էր Դերենիկ Աբրահամյանին, քանի որ նա ՀՊՏՀ 1-ին զոհված ազատամարտիկն է:

Հիշեցնենք, որ Դերենիկ Աբրահամյանի պատվին Գառնի գյուղի դպրոցը անվանվել է «Ատոմի անվան թիվ 2 ավագ դպրոց»:

ՀՊՏՀ Լրատվության և հասարակայնության հետ կապերի բաժին