Հայտնի է դարձել 2014 թ. տնտեսագիտության բնագավառի Նոբելյան մրցանակակիրը
2014 թվականի տնտեսագիտության բնագավառի Նոբելյան մրցանակն այսօր շնորհվել է ֆրանսիացի գիտնական, Թուլուզի Սոցիալական գիտությունների համալսարանի Արդյունաբերության տնտեսագիտության ինստիտուտի գիտական ղեկավար Ժան Տիրոլին: Ինչպես հաղորդում է Նոբելյան կոմիտեի պաշտոնական կայքը (www.nobelprize.org)՝ Տիրոլը մրցանակին արժանացել է «շուկայական իշխանության վերլուծության և կարգավորման համար»: Նոբելյան կոմիտեի գնահատմամբ՝ Տիրոլի աշխատությունները ցույց են տալիս, թե ինչպես կարգավորել այն ոլորտները, որտեղ գերիշխում են մի քանի խոշոր ընկերություններ: «Նման շուկաներում կարգավորման բացակայությունը հանգեցնում է անցանկալի սոցիալական հետևանքների՝ գների չմոտիվացված աճի կամ շուկայում այնպիսի ընկերությունների դիրքի պահպանման, որոնք գոյատևում են՝ կասեցնելով ավելի արդյունավետ ընկերությունների մուտքը շուկա:
Կարգավորման միջոցները կամ մրցակցային քաղաքականությունը պետք է հետևողականորեն հարմարացվեն ամեն առանձին ոլորտի պայմաններին: Ժան Տիրոլը ստեղծել է այդպիսի միջոցների մշակման ընդհանուր հենք և որոշակիացրել է դրա կիրառումը տարբեր ոլորտներում՝ հեռահաղորդակցությունից մինչև բանկային: Հենվելով նրա մշակումների վրա՝ կառավարությունները կարող են խրախուսել խոշոր ընկերություններին՝ դառնալ ավելի արդյունավետ և միևնույն ժամանակ կանխարգելել այն վնասը, որը վերջիներս կարող են հասցնել մրցակիցներին և սպառողներին»,- այս հիմնավորումն է ներկայացված Նոբելյան կոմիտեի հաղորդագրության մեջ:
ՀՊՏՀ Լրատվության և հասարակայնության հետ կապերի բաժին