Այսօր գրադարանավարի օրն է. ՀՊՏՀ-ում նույնպես նշվեց մասնագիտական տոնը
Այսօր նշվում է գրադարանավարի օրը: Տնտեսագիտական համալսարանի գրադարանավարների մասնագիտական տոնը շնորհավորելու համար ստորաբաժանում այցելեցին գիտության և արտաքին կապերի գծով պրոռեկտոր Գագիկ Վարդանյանը, գիտության բաժնի պետ Խորեն Մխիթարյանը: Տոնի առիթով գրադարանի տնօրինությունը կազմակերպել էր բուհի «Տնտեսագետ» հրատարակչության՝ 2008-2014 թթ. լույս տեսած գրքերի, մատենաշարերի ցուցադրություն:
Գագիկ Վարդանյանը, արժևորելով գրադարանավարի աշխատանքը, նրանց մասնագիտությունը բանաձևեց իբրև գիտելիքային աշխատողներ: Պրոռեկտորն անդրադարձավ գրադարանի կողմից իրականացված աշխատանքներին, մասնավորապես, գրքային ֆոնդի թվայնացման գործընթացին:
«Գրադարանավարի աշխատանքը բացի պատասխանատու լինելուց, երջանիկ աշխատանք է. քչերին է վիճակված աշխատել երիտասարդների հետ: Հաջողություն և նոր ձեռքբերումներ եմ մաղթում այս բարդ, բայց շնորհակալ գործում»,- բարեմաղթեց Գագիկ Վարդանյանը:
Մասնագիտական այս տոնն արժևորեց նաև ՀՊՏՀ գրադարանի տնօրեն Արմինե Հովհաննիսյանը: Լրատվության և հասարակայնության հետ կապերի բաժնի հետ զրույցում տնօրենը նշեց. «Գրադարանավարի աշխատանքը կարևորում է նաև պետությունը, ինչն արդեն իսկ արժևորում է գրադարանավարի գործը: Գրադարանավարը այն մասնագետն է, ով պետք է կարողանա ճիշտ ուղղորդել, իր գիտելիքների, փորձի և հմտության շնորհիվ բավարարել պատվիրատուի պահանջները: Գրադարանում աշխատելը որքան պատասխանատու, նույնքան էլ հաճելի է, քանի որ ամեն օր գործ ես ունենում գրքի հետ, որը աշխարհում ամենավեհ արժեքներից մեկն է»:
Շնորհավորում ենք բոլոր գրադարանավարներին, մաղթում բեղմնավոր աշխատանք:
ՀՊՏՀ Լրատվության և հասարակայնության հետ կապերի բաժին