Տեղի ունեցավ ռեկտորատի հերթական նիստը

ՀՊՏՀ ռեկտորատի այսօրվա նիստը սկսվեց գեղեցիկ արարողությամբ. ՀՊՏՀ ռեկտոր, պրոֆեսոր Կորյուն Աթոյանը ռեկտորատին ուրախությամբ հայտնեց, որ ՀՀ Նախագահ Սերժ Սարգսյանի հրամանագրով ՀՊՏՀ ֆիզդաստիարակության, ԱԻ և քաղպաշտպանության ամբիոնի դասախոս, մանկավարժական գիտությունների թեկնածու, պրոֆեսոր Լյովա Սամվելյանն արժանացել է  ՀՀ ֆիզիկական կուլտուրայի և սպորտի վաստակավոր գործչի պատվավոր կոչման՝ ֆիզկուլտուրայի և սպորտի բնագավառում մեծագույն ավանդի և ներդրման համար: Ռեկտորը ներկայացրեց՝ Լյովա Սամվելյանը պարգևատրվել է ոսկե մեդալով և շնորհագրով:

«Շնորհավորում եմ Ձեզ այս բարձր պարգևին արժանանալու կապակցությամբ: Սա մեծ պատիվ է, մաղթում եմ Ձեզ հետագա արգասաբեր աշխատանք՝ ի փառս մեր երկրի, մեր ժողովրդի»,- դիմելով Լյուվա Սամվելյանին՝ ասաց Կորյուն Աթոյանը:

Այս արարողությունից հետո ռեկտորատն անցավ օրակարգային հարցերի քննարկմանը: Դեկանները ներկայացրեցին մինչև 12 կրեդիտ պարտքով փոխադրված ուսանողների պարտքերի վերահանձնման, ինչպես նաև առկա բակալավրիատի և մագիստրատուրայի ամփոփիչ ատեստավորման արդյունքները:

Ուսումնակազմակերպական բաժնի պետ Արմեն Կարախանյանը զեկուցեց 2013-2014 ուստարվա երկրորդ կիսամյակի քննաշրջանի նախապատրաստման մասին՝  նշելով, որ այսօրվանից քննաշրջանը սկսվել է, այն սկսվել է ստուգարքներով: Ընդհանուր առմամբ, Արմեն Կարախանյանի հավաստմամբ, քննաշրջանի կազմակերպմանն առնչվող խնդիրները կարգավորված են: Նա նաև անդրադարձավ 2014-2015 ուստարվա հեռակա ուսուցման բակալավրիատի և մագիստրատուրայի 1-ին կիսամյակի ուսումնական պարապմունքների ու քննաշրջանի ժամկետների մասին հարցին: Բաժնի պետը նշեց, որ նախապես պրոռեկտորների և դեկանների հետ քննարկման արդյունքում պատրաստվել է ժամանակացույցը, որն էլ ներկայացրեց ռեկտորատի հաստատմանը: Ժամանակացույցն առաջիկայում կհրապարակվի ՀՊՏՀ պաշտոնական կայքում:

Ընթացիկ հարցերի շարքում Կորյուն Աթոյանը ռեկտորատի ուշադրությունը հրավիրեց մի քանի հարցերի վրա, մասնավորապես ուսանողների հաճախումների, ուսման վարձավճարների, ավարտական գործընթացների վրա:

ՀՊՏՀ Լրատվության և հասարակայնության հետ կապերի բաժին