ՀՊՏՀ ուսանողական խորհրդի ներկայացուցիչները մայիսի 9-ին այցելել են ՊՆ զորամաս, արժանացել պատվոգրի
Տնտեսագիտական համալսարանի ուսանողական խորհրդի մի խումբ ներկայացուցիչներ մայիսի 9-ին այցելել են ՀՀ պաշտպանության նախարարության զորամասերից մեկը: Այցի նպատակը բանակ-հասարակություն, մասնավորապես, համալսարան-զորամաս, ուսանող-զինվոր կապի ամրապնդումն էր:
Ինչպես հայտնում են ուսխորհրդից, ուսանողները շրջել են զորամասում, ծանոթացել զորամասի զինտեխնիկային, նրանց հնարավորություններին, բանակային կյանքին, նաև ներկա են գտնվել զորամասի կազմակերպած տոնական միջոցառմանը:
ՀՊՏՀ շնորհալի ուսանողները Շուշիի ազատագրման 22-րդ և Հայրենական պատերազմի 69-րդ տարեդարձին նվիրված ելույթներով և «Нар-Хоз» ՈՒՀԱ թիմը հումորային կատարումներով փորձել են բարձրացնել զինվորների տրամադրությունն ու օրը դարձրել են է'լ ավելի տոնական:
Զորամասի հրամանատարությունը միջոցառման ավարտին ՀՊՏՀ ուսանողական խորհրդին պարգևատրել է պատվոգրով, իսկ ուսանողները զորամասին նվիրել են ՈւԽ-ի կողմից տպագրված «Մարտական հաշվարկ» գրքի օրինակներ:
Հ.Գ. Լուսանկարները՝ ՈւԽ ֆեյսբուքյան էջից:
ՀՊՏՀ Լրատվության և հասարակայնության հետ կապերի բաժին