Հայաստանում Ֆրանկոֆոնիայի օրերի շրջանակներում ՀՊՏՀ-ում անցկացվեց միջոցառում
Հայաստանում Ֆրանկոֆոնիայի օրերի շրջանակներում ՀՊՏՀ-ում այսօր անցկացվեց հատուկ դաս, որի ընթացքում բակալավրիատի և մագիստրատուրայի ուսանողները ֆրանսերենով ներկայացրեցին ֆրանսիացի անվանի տնտեսագետների կյանքն ու գործունեությունը: Դասը կազմակերպվել էր օտար լեզուների ամբիոնի ֆրանսերենի դասախոսների նախաձեռնությամբ: Մասնակցում էին օտար լեզուների ամբիոնի վարիչ Սուսաննա Չալաբյանը, նույն ամբիոնի ֆրանսերենի դասախոսները, արտաքին կապերի բաժնի պետ Վարդ Ղուկասյանը, ուսանողներ:
ՀՊՏՀ-ականները ներկայացրեցին հայտնի տնտեսագետներ Անրի Ֆայոլի, Ժոզեթ Պեյղաղի, Ժան Ֆուրաստիեի, Ֆրանսուա Բենեի, Մորիս Ալլեի, Ժերար Շարոյի, Ժան Պոլ Ֆիտուսի, Էսթեր Դյուֆլոյի տնտեսագիտական գործունեությունը, մտքերն ու գաղափարները, խոսեցին ֆրանսիական մշակույթի մասին: Բանախոսները պատասխանեցին և' դասախոսի, և' ունկնդիրների հարցերին: Ֆրանսերենի դասախոս, դասի վարող Նեկտար Խաչատրյանը գոհունակություն հայտնեց ուսանողներին՝ ֆրանսերենին գերազանց տիրապետելու, ազատ հաղորդակցվելու համար:
Ինչպես ՀՊՏՀ լրատվության և հասարակայնության հետ կապերի բաժնի հետ զրույցում նշեց Սուսաննա Չալաբյանը, նմանատիպ միջոցառումների անցկացումը կարևոր է այն տեսանկյունից, որ արժևորվում է ֆրանսերենի, ֆրանսիական մշակույթի դերը. «Հատկապես վերջին ժամանակներում Հայաստանում ֆրանսերենի կարևորությունն ու նշանակությունը կարծես նվազել է: Այդ պատճառով ֆրանսերենով միջոցառումները, ուսումնասիրություններ կատարելը մեծապես նպաստում են ուսանողների անկաշկանդ հաղորդակցվելուն: Ֆրանսերենի դերը մեզ համար կարևոր է նաև նրա համար, որ Ֆրանսիան և Հայաստանը բարեկամ երկրներ են»,- ընդգծեց ամբիոնի վարիչը:
Միջոցառումը տպավորիչ և հետաքրքիր էր նաև ուսանողների համար: Նրանց խոսքերով՝ այսօրինակ միջոցառումները նպաստում են ուսումնառության արդյունավետությանը:
«Այս դասի շնորհիվ մենք զարգացրեցինք մեր ֆրանսերենի, միաժամանակ՝ տնտեսագիտական գիտելիքները: Նման դասերը մեզ հնարավորություն են տալիս ավելի խորը և մասնագիտական ուսումնասիրություններ կատարել և դրանք ներկայացնել ֆրանսերենով: Ֆրանսերենը գեղեցիկ, երգեցիկ լեզու է»,- մեզ հետ զրույցում ասաց կառավարման ֆակուլտետի 2-րդ կուրսի ուսանողուհի Սյուզի Աղաջանյանը:
Դասի ավարտին լավագույն ուսանողները պարգևատրվեցին ֆրանսերեն տնտեսագիտական գրքերով:
ՀՊՏՀ Լրատվության և հասարակայնության հետ կապերի բաժին