ՀՊՏՀ Եղեգնաձորի մասնաճյուղը միացել է «Մեկ հայ, մեկ հոդված» նախաձեռնությանը
ՀՊՏՀ Եղեգնաձորի մասնաճյուղում ապրիլի 26-ին տեղի է ունեցել հանդիպում Վիքիպեդիայի հայաստանյան ներկայացուցիչների հետ: Ինչպես լրատվության և հասարակայնության հետ կապերի բաժնին տեղեկացրեցին մասնաճյուղից, հանդիպումը ուսուցողական նպատակ ուներ. մասնավորապես, խոսվել է Վիքիպեդիայից (Ազատ հանրագիտարան) օգտվելու, գրառումներ կատարելու կանոնների մասին:
Հանդիպմանը բացման խոսքով հանդես է եկել մասնաճյուղի դասախոս, սեմինարի կազմակերպիչ Նարեկ Սարատիկյանը, ով ողջունելով հյուրերին, ամփոփ ներկայացրել է միջոցառման նպատակը: Ուսանողների կողմից ողջույնի խոսքով հանդես է եկել մասնաճյուղի ՈւԽ նախագահ Արգիշտի Միքայելյանը:
«Վիքիպեդիա Հայաստան» հասարակական կազմակերպության ներկայացուցիչ Մհեր Բեքարյանը ներկայացրել է Վիքիպեդիայի ընդհանուր կառուցվածքը: Հանդիպման ընթացքում մանրամասն ներկայացվել են հոդվածներ գրելու տեխնիկան և ոճական առանձնահատկությունները: Եղել են բուռն և ակտիվ քննարկումներ:
Նարեկ Սարատիկյանը մեզ հետ զրույցում նշեց, որ նախատեսվում է ուսանողների միջոցով Վայոց ձորի պատմամշակույթային, տեսարժան վայրերի և անվանի մարդկանց մասին Վիքիպեդիայում հոդվածներ տեղադրել՝ նպաստելով համացանցում մայրենի լեզվով տեղեկատվական նյութերի հարստացմանը:
Այսպիսով, ՀՊՏՀ Եղեգնաձորի մասնաճյուղը միացավ «Մեկ հայ, մեկ հոդված» նախաձեռնությանը և առաջին հոդվածով ներկայացրեց մասնաճյուղի համառոտ պատմությունը:
Այն կարող եք ընթերցել հետևյալ հղումով՝
https://hy.wikipedia.org/wiki/%D5%80%D5%8A%D5%8F%D5%80_%D4%B5%D5%B2%D5%A5%D5%A3%D5%B6%
D5%A1%D5%B1%D5%B8%D6%80%D5%AB_%D5%B4%D5%A1%D5%BD%D5%B6%D5%A1%D5%B3%D5%B5%D5%B8%
ՀՊՏՀ Լրատվության և հասարակայնության հետ կապերի բաժին