ՀՊՏՀ-ն նվաճեց «Դասախոսական գավաթը». ավարտվեց վոլեյբոլի միջբուհական առաջնությունը (լուսանկարներ)

ՀՊՏՀ մարզադահլիճում այսօր կայացան  ՀՊՏՀ նախաձեռնությամբ կազմակերպված «Դասախոսական գավաթ»  վոլեյբոլի միջբուհական առաջնության եզրափակիչ փուլի  վերջին երկու խաղերը, որի ընթացքում հանդիպեցին   ՀԱԱՀ-ԵՊԼՀ և ՀՊՏՀ-ՀՊՄՀ  թիմերը:

Այսօրվա  խաղերին  հետևում էին ՀՊՏՀ ռեկտոր Կորյուն Աթոյանը, Հայաստանի շախմատի ակադեմիայի տնօրեն, ՀՊՄՀ շախմատի և սպորտի ամբիոնի վարիչ Սմբատ Լպուտյանը,  դասախոսներ, ուսանողներ, մարզասերներ: Մասնակիցներին ողջունեցին , սպորտի հանդեպ վերաբերմունքը կարևորեցին ռեկտոր Կորյուն Աթոյանն ու Սմբատ Լպուտյանը՝ ընդգծելով նման միջոցառումների շարունակականության անհրաժեշտությունը:

Այսօրվա երկու խաղերն էլ լարված էին, բայց գեղեցիկ: Առաջին խաղում հանդես եկան ՀԱԱՀ-ԵՊԼՀ  թիմերը, երկրորդ խաղում գավաթի համար պայքար մղեցին  ՀՊՏՀ-ՀՊՄՀ թիմերը:  Այսպիսով, մրցանակային տեղերը բաշխվեցին հետևյալ կերպ՝ 1-ին տեղը զբաղեցրեց Հայաստանի պետական տնտեսագիտական համալսարանի թիմը, 2-րդ և 3-րդ տեղերը, համապատասխանաբար զբաղեցրեցին Հայաստանի պետական մանկավարժական և Երևանի պետական լեզվաբանական համալսարանների թիմերը: ՀՊՏՀ դասախոսական թիմը սեփական հարկի տակ նվաճեց «Դասախոսական գավաթը», որը հանձնեց ՀՊՏՀ ղեկավարը:

Կորյուն Աթոյանը, Սմբատ  Լպուտյանը և Տնտեսագիտական համալսարանի ֆիզդաստիարակության, ԱԻ և  ՔՊ ամբիոնի վարիչի ժ/պ Սիմոն Հակոբյանը պատվոգրեր հանձնեցին  մրցանակային տեղեր զբաղեցրած  թիմերի անդամներին, պարգևներ տրվեցին նաև  հատուկ անվանակարգերում. օրինակ , «Արդարացի խաղի համար» պատվոգիր ստացավ  ՀՊՃՀ-ի թիմը, «Կամքի համար»  անվանակարգում պատվոգիր ստացավ  Ագրարային համալսարանի թիմը:

Հարկ է նշել, որ  առաջնության բոլոր  հանդիպումներում թիմերից յուրաքանչյուրն աչքի ընկավ իր գեղեցիկ խաղով: Կորյուն Աթոյանը խաղի ավարտին շնորհակալություն հայտնեց  բոլոր թիմերին՝ ընդգծելով, որ այս առաջնությունում հաղթեց բարեկամությունը:

Հիշեցնենք, որ ՀՊՏՀ ֆիզդաստիարակության, ԱԻ և ՔՊ  ամբիոնի նախաձեռնությամբ հունվարի 23-ին մեր բուհում մեկնարկել էր  վոլեյբոլի բաց առաջնություն՝  հայաստանյան տարբեր  բուհերի ֆիզդաստիարակության ամբիոնների դասախոսների միջև: Նշենք նաև, որ առաջնությանը մասնակցում էին 5 բուհերի՝  Տնտեսագիտական, Ագրարային, Ճարտարագիտական, Մանկավարժական, Լեզվաբանական համալսարանների  դասախոսական թիմերը:

Շնորհավորում  ենք բոլոր թիմերին, մաղթում նորանոր մարզական նվաճումներ:

ՀՊՏՀ Լրատվության և հասարակայնության հետ կապերի բաժին