ՀՊՏՀ-ն փոխըմբռնման հուշագրեր է ստորագրել միջազգային մի շարք տնտեսագիտական համալսարանների հետ

Հայաստանի պետական տնտեսագիտական համալսարանը փոխըմբռնման հուշագրեր  է ստորագրել Կոլոմբոյի «South Eastern»   (Շրի Լանկա)  Մանիլայի «Adamson»  (Ֆիլիպիններ), Յոգջակարտայի «Gadjah Mada» (Ինդոնեզիա), տնտեսագիտական համալսարանների հետ ՝ փոխադարձ համաձայնությամբ համագործակցության նպատակով:

ՀՊՏՀ գիտության բաժնի պետ Խորեն Մխիթարյանը, ով նոյեմբերի 22-ից դեկտեմբերի 13-ը աշխատանքային այցով գտնվում էր վերոնշյալ երկրներում,  լրատվության և հասարակայնության հետ կապերի բաժնին հայտնեց, որ նշված համալսարաններից յուրաքանչյուրի հետ ձեռք է բերվել պայմանավորվածություն: Այսպիսով, համաձայն Կոլոմբոյի «South Eastern»   համալսարանի գիտության և միջազգային հարաբերությունների գծով պրոռեկտորի հետ հանդիպման ժամանակ ստորագրված փոխըմբռնման հուշագրի՝ 2014թ. փետրվար-մարտ ամիսներին նախատեսվում է այդ համալսարանի ղեկավարության այցը մեր բուհ՝ մասնագիտական փոխադարձ ծրագրեր սկսելու նպատակով: Մանիլայի «Adamson» համալսարանի ղեկավարության հետ հանդիպման ժամանակ ստորագրված փոխըմբռնման հուշագրով նախատեսվում է կրկնակի  դիպլոմների տրամադրում, ինչպես նաև փոխադարձ գիտահետազոտական ծրագրերի իրականացում: Յոգջակարտայի «Gadjah Mada»-ն տարածաշրջանի խոշոր համալսարանն է, որի հետ ձեռք բերված հուշագրով նախատեսվում է իրականացնել 2՝  ասպիրանտների և հայցորդների փոխանակային  և  պրոֆեսորադասախոսական կազմի փոխանակության ծրագրեր:

2014թ. մարտ-ապրիլ ամիսներին նախատեսվում է Ֆիլիպինների և Ինդոնեզիայի վերոնշյալ համալսարանների ղեկավարության այցը մեր համալսարան, որի ընթացքում կստորագրվեն համապատասխան պայմանագրերը:

«ՀՀ կառավարության կողմից  բուհերի միջազգայնացման ծրագրերը կարևորվում են ՝ որպես կրթական ոլորտի կառավարման գերակա ուղղություն: Այս տեսանկյունից՝ նշված համալսարանների հետ փոխըմբռնման հուշագրերի ստորագրումը և միջազգային համագործակցության հետագա խորացումը կնպաստեն ՀՊՏՀ ուսումնական և գիտակրթական գործունեության արդյունավետության բարձրացմանը: Մեր բուհն արդեն իսկ փոխըմբռնման հուշագրեր է կնքել  Ռումինիայի և Լեհաստանի տնտեսագիտական համալսարանների հետ: Հավելեմ, որ 2-րդ փուլով նախատեսվում է Արևելյան Եվրոպայի կրթական շուկայի հետ համագործակցություն»,-ընդգծեց  Խորեն Մխիթարյանը:

Նշենք, որ առաջիկայում նախատեսվում է վերոնշյալ համալսարանների ղեկավարությունների հետ  անցկացնել «վիրտուալ կոնֆերանսներ»:

ՀՊՏՀ Լրատվության և հասարակայնության հետ կապերի բաժին