Բաց դաս՝ «Հաշվապահական հաշվառման հիմնախնդիրները հանրային ոլորտում» խորագրով

Հաշվապահական հաշվառման և աուդիտի ֆակուլտետի  մագիստրանտների մասնակցությամբ այսօր  տեղի ունեցավ բաց դաս՝ «Հաշվապահական հաշվառման հիմնախնդիրները հանրային ոլորտում» խորագրով: Մագիստրանտները ներկայացրեցին Հայաստանի Հանրապետության հանրային հատվածի հաշվապահական հաշվառման  ստանդարտների մշակումներ:

ՀՀ Ազգային ժողովի կողմից հաստատվել է «1 ստանդարտը», որն իր մեջ ներառում է 26 բաժին. մագիստրանտներից յուրաքանչյուրը կատարել է մեկ կամ մի քանի բաժնի մշակում, որը ներկայացվեց բաց դասի ընթացքում: Ինչպես նշեց բաց դասի կազմակերպիչ,  ֆինանսական հաշվառման ամբիոնի վարիչ, տ.գ.թ., դոցենտ Ալվարդ Սարգսյանը, սա այս խորագրով  2-րդ բաց դասն է, որի անցկացումը բավականին արդյունավետ է:

Բաց դասին ելույթ ունեցան մագիստրատուրայի 2-րդ կուրսի ուսանողներ Վիգեն Թարխանյանը՝ «Հիմնական միջոցների հաշվառումը» (բաժին 11), Արտակ Այանյանը՝ «Ոչ նյութական ակտիվների հաշվառումը» (բաժին 12), Անի Գրիգորյանը՝ «Պարտավորությունը և զուտ ակտիվների  հաշվառումը» (բաժին 24), Լիլիթ Պետրոսյանը՝ «Չփոխանակվող գործարքներից հասույթի հաշվառումը» (բաժին 26)  ստանդարտների վերլուծությամբ (մշակմամբ):

Ալվարդ Սարգսյանը ՀՊՏՀ լրատվության և հասարակայնության հետ կապերի բաժնի հետ զրույցում կարևորեց բաց դասերի անցկացումը՝ նշելով. « Բաց դասերի անցկացումն անհրաժեշտ է հատկապես մագիստրանտների շրջանում, քանի որ այն նպաստում է ուսանողների ինքնուրույն աշխատանք, ուսումնասիրություն, հետազոտություն  կատարելուն, ինչն էլ իր հերթին  խթանում  է ուսանողակենտրոն  դասերի անցկացումը: Հետաքրքիր են հատկապես ծավալվող թեժ քննարկումները, որի ժամանակ ուսանողները միմյանց հարցադրումներ են ներկայացնում և վերլուծություններ կատարում: Դա զարգացնում է նրանց մտավոր և ստեղծագործական  ունակությունները»,- նշեց Ալվարդ Սարգսյանը:

ՀՊՏՀ Լրատվության և հասարակայնության հետ կապերի բաժին