Հետազոտություն «Կրթական ծրագրերի և տեխնոլոգիաների հետազոտություն և զարգացում» ուղղության շրջանակներում

Դիտումների քանակ՝ 1075

ՀՊՏՀ  կոնֆերանսների դահլիճում այսօր տեղի ունեցավ «Կրթական ծրագրերի և տեխնոլոգիաների  հետազոտություն և զարգացում»  ուղղության շրջանակներում «Ամբերդ» հետազոտական կենտրոնի հերթական գիտական սեմինարը, որին մասնակցում էին գիտության և արտաքին կապերի գծով պրոռեկտոր Գագիկ Վարդանյանը, հետազոտական կենտրոնի տնօրեն Սամվել Ավետիսյանը, կենտրոնի և ՀՊՏՀ այլ աշխատակիցներ, ուսանողներ, դասախոսներ:

Սամվել Ավետիսյանը, ողջունելով սեմինարի մասնակիցներն, նշեց, որ «Կրթական ծրագրերի և տեխնոլոգիաների հետազոտություն և զարգացում» թեման առանձնահատուկ է այն առումով, որ բոլորիս անմիջականորեն առնչվում է:

Նշենք, որ հետազոտական խմբի ղեկավարն է ուսումնամեթոդական աշխատանքների գծով պրոռեկտոր Պարույր Քալանթարյանը, խմբի անդամներն են՝ որակի ապահովման բաժնի պետ,  ՅՈՒՆԵՍԿՕ-ի Կրթության կառավարման ամբիոնի վարիչ Ներսես Գևորգյանը, ասիստենտ Գայանե Մերդինյանը:

Պարույր Քալանթարյանը նշեց, որ հետազոտության նպատակն է կրթական ծրագրերի վերլուծությունը  և արդյունավետ կիրառման հնարավորությունների ուղենշումը: Պրոռեկտորն ընգծեց նաև ուսանողակենտրոն կրթական համակարգի կարևորությունը:

Հետազոտության  արդյունքները լուսապատկերի միջոցով  ներկայացրեց Գայանե Մերդինյանը: Վերջինս  նախ խոսեց հետազոտության  հիմնական ուղղությունների մասին,  այն է՝ միջազգային փորձի ուսումնասիրություն, կրթական ծրագրերի և տեխնոլոգիաների զարգացում, մեթոդաբանական ուղեցույցի մշակում և հրապարակում, այնուհետև  անդրադարձավ Բոլոնիայի գործընթացին, Բոլոնիայի սկզբունքներին համապատասխան ՀՀ կրթական համակարգի առկա խնդիրներին և այլն:

Հետազոտական խմբի կողմից ներկայացվեցին առաջարկություններ. մեխանիզմներ՝ ուղղված կրթության որակի բարելավմանը: Սեմինարի ավարտին ծավալվեց թեժ քննարկում, հետազոտողները պատասխանեցին մասնակիցների հարցերին:

ՀՊՏՀ Լրատվության և հասարակայնության հետ կապերի բաժին